“Женко”-гийн шударга бус шүүхийн хонгил устсангүй

Эко автомашин импортлогчдын холбооноос хотын дарга Х.Нямбаатарын “Хэдэн халтар төгрөг цуглуулсан ченжүүдээс айхгүй” гэсэн үгэн дээр шүүхийн шийдвэр хүртэл гаргуулж, олон нийтийн сүлжээнд “од” болоод байна. 

Анх автомашины улсын дугаар олголтод хязгаарлалт тогтооход 37000 автомашиныг хилээр оруулж ирэх арга ядсан шаардлага тавьснаар тэдний үл ойлголцол эхэлсэн. Ченжүүдийн “Нэр төрд халдлаа гэх” гомдлыг Баянгол, Хан-Уул, Сонгинохайрхан дүүргийн Иргэний хэргийн анхан шатны шүүх хүлээн авч, ченж нарт “элэг”-тэйгээр шийдвэрлэсэн нь цаанаа учиртай байж. 

Гомдлыг гаргагч “Эко автомашин импортлогчдын холбоо”-ны тэргүүн Ц.Лхагважав нь “Женко” Х.Баттулгын сайн нөхөр. Өнгөрсөн сонгуулиар уулзалт, цуглаан болгонд “Женко”-гийн ойр байж, сурталчилгаанд идэвхтэй оролцож, түүний үг бүрийг ёсчлон биелүүлж байсан нь саяхан. Үүнийг нь харсан, үзсэн, мэдэх хүмүүс ч олон байна. 

Тэргүүн Ц.Лхагважавын гомдлыг хүлээн авч, нүдээ боолгоостойгоор шүүхийн шийдвэрийг тамгалсан хүн нь харин “Женко” Х.Баттулгын ойрын хүн Г.Төрболд шүүгч. Тэрээр “Женко”-гийн үед “илжирсэн” шүүхийн тогтолцооны бодит оролцогч байсан. 

Тодруулбал, тухайн үед ШЕЗ-ийн Шүүхийн захиргааны хяналт, шалгалт хариуцсан референтээр томилогдож, удаагүй Баянгол, Хан-Уул, Сонгинохайрхан дүүргийн Иргэний хэргийн анхан шатны шүүхийн шүүгчээр заларчээ. 

Ингээд “Женко”-ийн нэг “сайн” нөхөр нь гомдол гаргаж, нөгөө “сайн” нөхөр нь гомдлыг шүүхийн шийдвэр болгон биежүүлсэн түүхтэй. Цаашид “Женко”-гийн босгосон шударга бус шүүхийн систем задран унах эсэх нь одоо ч тодорхойгүй хэвээр. Шударга бус шүүхийн гар хөл бологсод одоо хүртэл оршин байсаар л байна.