Төрөх, үхэх нь хүмүүний жам, түүхийн салшгүй хэсэг билээ. Зөв.мн улирч буй 2023 онд та биднийг орхин одсон олны танил алдартнуудын талаарх мэдээллийг хүргэж байна.
Тина Тернер
АНУ-ын алдарт дуучин, “Рок н роллын хатан хаан” хэмээн алдаршсан Тина Тернер 83 насандаа таалал төгслөө. Грэммин шагналыг наймантаа хүртэж, The Best, Let’s Stay Together зэрэг цомгоороо дэлхийн нийтийг байлдан дагуулсан түүний хувийн амьдрал харамсалтай нь, тайзан дээрхээсээ эсрэгээр өрнөсөн билээ. Залуудаа харгис нөхрийн гарт тарчилсан тэрээр амьдралынхаа сүүлийн 10 жилд зүрхний шигдээс, бөөрний дутагдал болж, хоёр хүүгээ алдсан зовлон шаналал дунд өнгөрчээ.
Пако Рабан
Францын загвар зохион бүтээгч, Paco Rabanne загварын байшинг үүсгэн байгуулагч Пако Рабан 88 насандаа таалал төгслөө. Шинийг санаачлагч, хурц ухаантай түүнийг 1960-аад онд гарсан хувцас загварын хувьсгалын гол авторуудын нэг гэж тооцдог. Загвар өмсөгчдийг тайзан дээр алхах үед хөгжим тавих санаачилгыг тэрбээр анх гаргасан. Үнэртэй усыг эрэгтэй, эмэгтэйчүүдэд зориулж тусад нь үйлдвэрлэхийг сэдсэн, хар арьст загвар өмсөгчдийг анх тайзан дээр гаргасан, хувцсыг даавуунаас гадна металл, пластик ашиглаж хийдэг болсон гээд олон шинэчлэлийг тэрбээр эхлүүлжээ.
Тото Кутуньо
Италийн хөгжмийн зохиолч, “Итали эр” хэмээх дуугаараа олон улсад алдаршсан Тото Кутуньо 80 настайдаа таалал төгсжээ. Адриано Челентано, Жо Дассен зэрэг олон дуучидтай хамтарч ажиллаж, дууг нь зохиож өгдөг байсан тэрбээр Итали эр дууг А.Челентанод өгөх гэж байгаад больж, өөрөө дууснаар дуучны замнал нь гэрэлтсэн байдаг. Монголчуудын сайн мэдэх энэ уран бүтээлж 1990 онд “Евровижн” хөгжмийн наадамд түрүүлж байжээ.
Мэтью Перри
АНУ-ын жүжигчин, кино зохиолч Мэтью Перри 54 насандаа зүрх нь гэнэт зогсож, нас барав. 1994-2004 онд үргэлжилсэн “Найзууд” цувралын Чандлер Бингийн дүрд тоглож алдаршсан тэрээр уран бүтээлчийн замналаа 1984 оноос эхлүүлж, “Луйварчид” зэрэг олон кинонд тогложээ.
Хенри Киссинжер
Улс төрийн бодлогоч, АНУ-ын Төрийн нарийн бичгийн дарга асан Хенри Киссинжер 100 наслаад энэ жил тэнгэрийн орныг зорив. Одоо тогтож байгаа дэглэм, олон улс, улс төр, эдийн засгийн олон механизмын автор, хөгжүүлэгч гэдгээр нь түүнийг олон нийт мэддэг. Тогтолцоо ашиггүй туссан улс орнууд магадгүй, үзэн яддаг байсан байх. 1973-1977 онд Төрийн нарийн бичгийн дарга буюу Гадаад харилцааны сайд байхдаа Вьетнамын дайныг зогсооход хүчин чармайлт гаргаж, Нобелийн эхнтайвны шагналаар шагнагдаж байв.
Амьдралынхаа сүүлийн жилүүдийг Украиныг УАЦЭ-д элсүүлэхгүй байх талаар ажиллаж өнгөрөөсөн байна.
Сильвио Берлускони
Италийн нэгэн цуутай эр, улс төрч, тэрбумтан Сильвио Берлускони 86 насандаа таалал төгсжээ. Улсынхаа Ерөнхий сайдаар дөрвөнтээ /1994, 2001, 2005, 2008/ сонгогдож ажилласан тэрээр хөлбөмбөгийн “Милан” багийн эзэн гэдгээрээ олон улсад танигдсан нэгэн байсан юм.
Бизнесийн хувьд, хэвлэл мэдээлэл, даатгалын бизнест хүч үзэж, Европыг хамарсан арилжааны телевизүүдийн анхны сүлжээг байгуулж явжээ.
Майкл Гэмбон
Британийн жүжигчин, ирланд үндэстэн Майкл Гэмбон 180 гаруй уран бүтээлд тоглосноос “Харри Поттер” цувралын Дамблдорын дүрийг бүтээсэн гэдгээ илүү танигдсан нэгэн байв. Тэрбээр энэ жил 82 настай байжээ.
Лиза Мария Пресли
АНУ-ын дуучин, рокн роллын хаан Эльвис Преслигийн цорын ганц охин Лиза Мария Пресли 54 насандаа ертөнцийн мөнх бусыг үзүүлжээ. Харьцангуй залуу түүний үхэл олон хүнд гэнэтийн байв.
Тэрбээр дуучны хувиар 2003 онд буюу 35 насандаа л анхны амжилтаа гаргаж, танигдсан. Өмнө нь эцгийнхээ нэрээр явдаг байв.
Хувийн амьдралын тухайд, 1988 онд хөгжимчин Дэнни Киотой гэрлэж, охин Даниэль Райли, хүү Бенжамин /2020 онд амиа хорлосон/ нарыг төрүүлсэн ч 1994 онд салсан. Тэрбээр дараа нь дуучин Майкл Жексон, хөгжимчин Жон Ощайце, жүжигчин Николас Кейж, продюсер Майкл Локвуд /2008 онд ихэр охид Харпер Вивьенн Энн Локвуд и Финли Аарон Лав Локвуд төрсөн/ нартай гэрлэж байгаад 2020 онд хүү Бенжамин нь амиа хорлож нас барсны дараа анхны нөхөр Дэнни Киотой амьдарч эхэлсэн байдаг. Тэд Лиза Мариг амьдралаас буцтал хамт байжээ.
Ромын пап 16 дугаар Бенедикт
2013 онд ширээнээс бууж, амьд сэрүүн ахуйдаа хамбын суудлаас буусан ховор тохиолдлыг бий болгосон Бенедикт 16 95 насандаа он солигдох мөчид ертөнцийн мөнх бусыг үзүүлжээ.
Жанлука Виалли
Италийн шигшээ, “Челси”, “Ювентус” багийн довтлогч асан Жанлука Виалли хорт хавдрын улмаас 58 насандаа таалал төгсжээ. Тэрбээр тоглогчийн замналаа дуусгаад Сери А, Английн премьер лигийн багуудыг дасгалжуулж байв.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна