Гурван настнуудыг энэ сарын 14-нөөс цэцэрлэгт хамруулна

Боловсрол, шинжлэх ухааны яамнаас 2021-2022 оны II улирлын хичээлийг эхлүүлэх бэлтгэл ажлын талаар мэдээлэл хийлээ. Энэ үеэр мөн бага насны хүүхдийн цэцэрлэгт хамрагдалтын талаар мэдээлэл өглөө. 

БШУ-ны сайд Л.Энх-Амгалан:  "3 настай хүүхдүүдийг хоёрдугаар сарын 14-нөөс эхэлж цэцэрлэгт авна. Гэхдээ хоёр настай хүүхдүүд гурван настай руу шилжээд орчихсон учир бүртгэл шаардлагагүй хүүхдүүд тухайн цэцэглэгтээ хамрагдана.

Хоёр насандаа бүртгэлээс гадуур үлдсэн хүүхдүүдийг шинээр бүртгэнэ.

Гурван настай нийт 76,763 хүүхэд байгаагаас цэцэрлэгт 61 хувь буюу 47 мянган хүүхдийг л хамруулах боломжтой. Тиймээс төрийн өмчит цэцэрлэгийнхээ боломжийг нэлээд шахна. 

Сургуулийн өмнөх боловсролд:

• 3 настнуудын 61 хувийг,
• 4 настны 86 хувийг,
• 5 настай хүүхдүүдийг 100 хувь хамруулахаар зорьж байна" гэв.