СУРВАЛЖИЛГА: “Сурагчдын дүрэмт хувцасны загварыг дахин шинэчлэхгүй бол бараг л шуудай”

Шинэ хичээлийн жил эхлэх цаг ойртож байгаатай холбогдуулан циркийн баруун тал, 3-4 дүгээр хорооллын урдуур сурагчдын дүрэмт хувцас болон бичиг хэргийн худалдаа наймааны асрууд бий болжээ. Манай улсын ерөнхий боловсролын сургуулийн сурагчид ижил загварын дүрэмт хувцас өмсдөг. 

Энэ жилийн дүрэмт хувцасны үнэ ханш бусад жилийнхтэй харьцуулахад хэр өссөн талаар ерөнхий боловсролын сургуулийн сурагчид болон хүүхдийнхээ хичээлийн жилийн хэрэглээг базааж буй эцэг эхчүүдийн сэтгэгдлийг сонсохоор циркийн баруун талыг зорилоо. 

        “Дунд, ахлах ангийнхны дүрэмт хувцасны загварыг дахин шинэчлэхгүй бол бараг л шуудай”

“Би Нийслэлийн ерөнхий боловсролын тавдугаар сургуулийн төгсөх ангийн сурагч. Зарим хүүхдүүд бусдыг өмссөн зүүснээр нь ялгаж харьцах гээд байдаг талтай. Тэгэхээр ерөнхий боловсролын сургуулийн сурагчдыг дүрэмт хувцсаар жигдрүүлэх нь нэгнээ өмссөн чөлөөт хувцсаар нь ялгахгүй байх, дээрэлхэлт мэтийн олон асуудлаас хамгаалж жигд харилцааг бий болгоход тусалдаг байгаа юм. Тэглээ гээд чанаргүй муу материалтай формын хувцас өмсөх хэцүү байдаг. Наад зах нь л гэхэд бөөсөрнө, өөртөө аймар их хог татаж амархан гялайгаад угаахаар өнгөө алдаад асуудал бишгүй л их. Тийм хэр нь аймар үнэтэй. Би төгсөх ангийн сурагч ч гэлээ 200.000 төгрөгөөр шинэ форм худалдан авч байна. Өнөөдөр монголын иргэдийн амьжиргааны түвшин хэр билээ дээ, бараг тал үнээр нь л зарахад хангалттай санагддаг. Бас дунд, ахлах ангийнхны дүрэмт хувцасны загварыг дахин шинэчлэхгүй бол бараг л шуудай. Жишээ нь юбка нэг бол уртдаад, нэг бол бэлхүүсээрээ томдоод таарсан размергүй. Өмсөж л байвал болоо гээд хийчихсэн юм шиг” хэмээн төгсөх ангийн сурагч М өөрийн сэтгэгдлээ бидэнтэй хуваалцлаа.

                                            “Зөвхөн Азийн улс орнууд л дүрэмт хувцас өмсдөг”

Бидний дараагийн ярилцсан иргэн бол хоёр хүүхдийн аав иргэн Б юм. “Би бага насны хоёр хүүхэдтэй. Том хүү минь одоо гуравдугаар ангийн сурагч. Хүүхдийнхээ дүрэмт хувцсыг хоёр жилд нэг удаа сольдог. Энэ жилийн дүрэмтийн үнийн хувьд цамц, өмд, хүрэм нийлээд 159.000 болсон. Материалыг нь хэлж мэдэхгүй байгаа ч өмнөх жилүүдээ бодвол хамаагүй нимгэрсэн байна лээ. Ер нь бол зөвхөн Азийн улс орнууд л дүрэмт хувцас өмсдөг. Европын орнуудаар арван жилийн сурагчид нь чөлөөт хувцастай л хичээлдээ явдаг шүү дээ, манай улсын хувьд Европын улс орнуудын жишгийг дагахад буруудах зүйлгүй гэж боддог” гэв.

                          “Охид дүрэмт хувцас сонгохдоо юбка эсвэл өмднөөс сонголт хийх эрхтэй”

“Би ЕБС-д сурдаг гурван хүүхэдтэй. Энэ жил дүрэмт хувцасны үнэ нь хоёр дахин нэмэгдчихсэн дан цамц нь л гэхэд бараг 40000 төгрөг болсон байна. Гурван хүүхдийн дүрэмт хувцас бас бус хэрэглээнд нь бишгүй л их зардлыг жил бүр гаргадаг. Ахлах ангийн охин маань дүрэмт хувцас өмсөх ер нь л дургүй. Амархан бөөсөрдөг дээрээс нь юбка өмсөхөөр биед нь тухгүй байдаг гэж байнга ярьдаг. Миний бодлоор арван жилийн сургуульд юбка өмсөх дургүй охид олон бий. Тиймээс хувцасны үйлдвэрүүд охидод юбка эсвэл өмдний сонголтыг бий болгож өгөх хэрэгтэй санагддаг. Өөрийнхөө биед тухтай хувцас өмсвөл бүтээмж нэмэгдэнэ шүү дээ” хэмээн иргэн Н хэллээ. 

       “Монголын үндэсний хувцасны хэв маягийг шингээсэн дүрэмт хувцастай болоосой гэж хүсдэг”

Зуны чөлөөт цагаараа сурагчдад дүрэмт хувцас худалдаалахаар ажиллаж буй их сургуулийн оюутан С: “Хичээл орохоос өмнө мөнгө бага ч болов мөнгө цуглуулах хэрэгтэй болов уу гэж бодоод дүрэмт хувцас худалдаалахаар ажиллаж байна. Арван жилийн сурагч байхдаа дүрэмт хувцасыг монголын үндэсний хэв маягийг шингээсэн загвар хийцтэй байсан ч болоосой гэж их хүсдэг байсан. Нэгэн төрлийн хэвшмэл загварт баригдалгүй доогуураа өмд дээд хэсгээрээ монгол цамц өмсдөг бол их гоё л байна байх” хэмээв.

Манай улсад сурагчдын дүрэмт хувцас үйлдвэрлэдэг таван брэнд үйлдвэр ажиллаж байна. Үйлдвэрээсээ хамааран материалын эдэлгээ янз бүр байдаг төдийгүй үнийн хувьд ч тодорхой хэмжээнд зөрүүтэй байдаг. Тэдгээр үйлдвэрүүдийг нэгдсэн нэг төрлийн материал, ижил үнээр дүрэмт хувцсаа үйлдвэрлэдэг болоосой хэмээн иргэд хүсэж буйгаа илэрхийлсэн юм.

Сурвалжилсан: Т.Тэргэл