Х.Булгантуяа: Ерөнхий сайд аа У.Хүрэлсүх дарга шиг Орчны бохирдлыг бууруулах үндэсний хороог өөрөө ахлаад ажиллаач

Сүүлийн үед утааны асуудал УИХ, Засгийн газрын төвшинд хөндөгдөн, холбогдох асуудал хариуцсан томоохон албан тушаалтнуудыг ажлаас нь чөлөөлсөн. Тэгвэл УИХ-ын чуулганы үеэр УИХ-ын гишүүн Х.Булгантуяа Ерөнхий сайдад хандан:  "Сүүлийн хоёр өвөл Монголчууд бидний уушгинд хэцүү өвөл боллоо. Ковид тусаагүй хүн бараг үлдээгүй байх. Зарим нь хоёр, гуравдахаа тусч байна. Агаарт гар гэдэг, ийм утаагаар амьсгалах юм бол үнэнийг хэлэхэд гараад ч хэрэггүй болчхоод байна. Би дэд сайд байхад Орчны бохирдлыг бууруулах үндэсний хорооны гишүүн байсан. Хамгийн анх У.Хүрэлсүх Ерөнхий сайд байхдаа энэ хороог ахалдаг байсан. Би Л.Оюун-Эрдэнэ Ерөнхий сайдыг энэ өвлийг даван туултал энэ хороог ахлаач ээ гэж хүсч байна.  Ингэж бүх ажлуудын уялдаа холбоог хангаж өгөхгүй бол одоо дахиад баахан хүмүүс солигдох юм шиг байна. Гуравдугаар сар хүртэл зай байна. У.Хүрэлсүх дарга хамцуйгаа шууж байгаад л энийг хэн хариуцах вэ, төсөв нь хаана байна, энэ яагаад болоогүй байгаа юм гээд явдаг байсан. Үүнтэй адилхан Ерөнхий сайд та өөрөө энэ хороог ахлаач ээ" гэв. 

Хариуд нь Ерөнхий сайд Л.Оюун-Эрдэнэ: "Мэдээж улс төржилт байлаа гээд өнгөрсөн 30 жилд яасан юм. Өмнө утаа байсан одоо бид нар шийдлээ ярих хэрэгтэй. У.Хүрэлсүхийн засгийн газар шийдэл гаргасан нь үнэн. Энэ шийдэлд технологийн горим болон бусад алдаанууд гарсан гэж үзсэн учраас хариуцлага тооцож байна. Цаашдаа шат шатандаа энэ асуудлыг шийдээд явах ёстой. Ерөнхий сайдын хувьд ихэнх асуудлуудруу гүнзгий орж байгаа та санаа зовох хэрэггүй. Намайг ажил хийхгүй өрөөндөө суугаад байдаг хүн гэж та нээх бодоод хэрэггүй байх. Бүх зүйлрүү деталчилж орохыг хичээж байгаа. Тогтолцоо цааш нь явах ёстой. Сайдын төвшинд, газрын даргын төвшинд  асуудал шийдэгддэг байж Монгол Улс цааш явна. Түүнээс нэг хүндээр тогтдог кабинет байж болохгүй. Тийм учраас улс төр хийхээс илүү тогтолцооных нь хувьд харах нь чухал болов уу гэж бодож байна" хэмээлээ.