Хүчирхийлүүлсэн 6 настай охины ААВ: Салсан эхнэр маань "Эргэж нийлэхгүй бол хүүхдүүдийг чинь алаад өөрийгөө ална" гэдэг

Хэрцгийгээр бусдад зодуулж буй бага насны хүүхдийн бичлэг өнөөдөр олон нийтийн сүлжээгээр цацагдсан. Тодруулбал, зургаан настай хүүхдийг асран хамгаалагч нь гэр цэвэрлэсэнгүй, аяга угаасангүй гэх шалтгаанаар зодож буй бичлэгийг цахим орчинд нийтэлсэн байв. 

Бид хүчирхийлэлд өртсөн зургаан настай охин "М"-ийн аав "З"-тэй ярилцлаа.

-Та хүүхдүүдээ хүчирхийлэлд өртөж буй асуудлаар цагдаагийн байгууллагад хандсан уу?

-Би цагдаагийн байгууллагад хандсан. Өчигдөр цагдаагийн байгууллагад өргөдөл, гомдлоо өгсөн. 

-Хүүхдүүд нь хүчирхийлэлд өртөөд байгааг хэзээ мэдсэн бэ? 

-Мэдээд хэд хонож байна. Яг хэзээнээс эхлэснийг тодорхой мэдэхгүй байна. Хүүхэд хамгааллын 108 болон холбогдох хуулийн байгууллагад нь хандсан. 

Утсаар мэдээлэл зөвлөгөө авч байгаад эцсийн аргаа хэрэглээд цагдаагийн байгууллагад өргөдөл гомдол гаргасан. Хүүхдүүд маань миний салсан эхнэр болон ээж аавтай нь хамт амьдардаг. Тэдний хаягийг тодорхой мэдэхгүй байсан учраас өмнө нь өргөдөл өгч чадаагүй. Хайж байгаад гэрийн хаягийг нь олж мэдээд шууд өргөдөл гомдлоо өгсөн. Одоо хэрэг шалгагдаж байгаа.

-Тухайн бичлэгийг тан руу хэн илгээсэн бэ ?

Манай салсан эхнэр явуулсан. Би эхнэрээсээ жилийн өмнө салсан. Одоо тусдаа амьдардаг. Гол шалтгаан нь байнга буцаж нийлээд амьдралаа бодъё гээд над руу залгаад яриад байдаг.Мэдээж үнэхээр болж бүтэхгүй болоод салаад тусдаа байгаа шүү дээ. 

Хэрвээ эргэж нийлэхгүй бол хоёр хүүхдийг чинь алаад дараа нь өөрийгөө ална гэж сүрдүүлдэг. Эсвэл хүүхдүүд чинь ингэж зовж байна гээд зодож уйлуулаад бичлэг хийгээд над руу явуулж дарамтлаад байгаа. "Хүүхдүүдээ хар! ингэж зовоож амьдруулмаар байна уу эсвэл нийлээд амьдрах уу" гэдэг.

-Бичлэг дээр "Эх шиг ээ арчаагүй амьтан гэж" хэн нэгэн яриад байсан?

-Би бол эмээ нь хэлж байгаа. Мөн тухайн бичлэгийг эмээ нь хийсэн гэж бодож байна. Өмнө нь зөндөө зодуулсан, уйлуулсан бичлэг зураг явуулдаг байсан. Энэ бол хүний ёсноос гажууд үйлдэл. 

Нялх хүүхдийг зодож уйлуулчхаад бичлэг зураг явуулж байгаа нь хэцүү байна. Миний хувьд гомдолтой байна. Өөрсдийн гэр бүлийн групп чат байдаг.Тухайн группт ээж аав нь өөрөө болон эгч дүү нь байдаг.Тэр групп чатад зодсон бичлэг зургаа оруулсан. 

Гэвч бүгд харсан хэр нь тоохгүй цагдаагийн байгууллагад хандаагүй. Энэ байдлыг нь өөхшүүлж байгаа нь буруу.Энэ бол хэн ч хараагүй нүднээс далд болоод байгаа зүйл биш. 

-Хүүхдүүдийг тань зоддог, хүчирхийлдэг байсныг та өмнө нь анзаарч байв уу ?

-Хүүхдүүдийн эмээ ер нь их хатуу ширүүн харилцаатай хүн. Тэр харааж байгаа нь бол энгийн өдөр тутамд болдог зүйл. Түүнчлэн бас архины хамааралтай ч хүн байж магадгүй. Хааяа ганцаараа архи ууж харагддаг. 

Миний хажууд бол хүүхдүүдээ зодох хүчирхийлэх үйлдэл гаргадаггүй. Би хүүхдүүдээ очоод авах гэхээр цагдаагийн байгууллагад хандаж, намайг бараг зодож хүчирхийлж байгаад миний хүүхдийг авчихлаа гэдэг.

 -Та хүүхдүүдтэйгээ хэр ярилцдаг вэ?

 -Салаад тусдаа байгаа хугцаандаа хүүхдүүдтэйгээ уулзъя гэхээр мөнгө төгрөг өгч байж уулз гэдэг. Мөнгө өгч байж л хүүхдүүдтэйгээ уулздаг байсан.

-Таны хүүхдүүд хэдэн настай вэ?

-Нэг нь Зургаан настай, нэг нь дөрвөн настай.

- Хүүхдүүдтэйгээ уулзсан уу? Хамгийн сүүлд хэзээ уулзсан бэ?

Хамгийн сүүлд өчигдөр хүүхдүүдтэйгээ уулзсан. Цагдаагийн байгууллагад дуудлага мэдээлэл өгөөд, цагдаатай хамт очсон. Би дуудлага, мэдээллээ өгчхөөд заавал цагдаатай хамт очих шаардлагатай байсан. 

Хэрвээ ганцаараа очих юм бол дарамталсан, дээрэлхсэн гээд миний эсрэг гомдол гаргах учраас цагдаатай хамт очсон. Очих үед манай хоёр охин, ээжтэйгээ гурвуулаа байсан. Тэгээд хамт очиж тайлбар мэдүүлгээ өгсөн. 

-Хүүхдүүдийн ээжтэй ярьсан уу ? 

-Над руу яриад "Чи ингэж байна уу тэ" гэх мэтчилэн янз бүрээр занаж дарамталсан. 

Хүүхдүүдийн бие болон сэтгэл санааны байдал ямар байгаа вэ ? 

Үйл явц болоод дууссан учраас хүүхдүүдийн биеийн байдал гайгүй байгаа ч, их айж сандарсан байсан.  Бичлэг дээр зодуулж байгаа хүүхэд бол манай том хүүхэд. Охин маань дуулж, бүжиглэдэг, цэцэрлэгтээ тэмцээн уралдаанд идэвхтэй оролцдог сэргэлэн, цовоо хүүхэд. 

Гэвч өчигдөр уулзахад юмнаас айсан байдалтай байсан. Уг нь эрхлээд л хүзүүнээс зүүгдчихдэг хүүхэд байсан. Бага хүүхэд маань жаахан учраас юм ойлгохгүй. 

Хүүхдүүд нь одоо хаана байгаа вэ ? 

Хүүхдүүд маань хамгаалах байранд байгаа эсэхийг одоогоор сайн мэдэхгүй байна. Цагдаагаас тодруулж байна. Миний гол зорилго бол хүүхдүүдээ өөр дээрээ авах. 

Гэвч миний бодсоноор болчихдог тийм амархан асуудал биш гэж цагдаа, холбогдох хүмүүс нь хэлсэн. Манай эхнэр бол "Ав, ав хүүхдээ ав" гэж байгаа ч, яг очоод авах гэхэд утсаа унтраачихдаг. "Чаддаг юм бол орж ирээд авчих" гэнэ. Тэгээд би орох л юм бол шууд цагдаа дуудаад, энэ хүн намайг дарамтлаад, дээрэлхээд байна гээд хэцүү, асуудалтай байдаг.