Монголбанкны Мөнгөний бодлогын хороо хуралдаж, бодлогын хүүг 1 нэгж хувиар бууруулжээ. Мөн малчны эргэн төлөлт нь доголдсон зээлд бүтцийн өөрчлөлт хийж, хугацааг сунгасан байна.
Дээрх шийдвэрийг гаргахад эдийн засгийн гадаад, дотоод орчны дараах нөхцөл байдал, ирээдүйн төлөв голчлон нөлөөлжээ. Үүнд:
Дотоод эдийн засгийн тухайд, идэвхжил нэмэгдэж, бодит эдийн засаг 2023 онд 7.0 хувиар өслөө.
Дээрх эерэг нөхцөл байдлын нөлөөгөөр инфляци үргэлжлэн буурч, 2024 оны хоёрдугаар сард улсын хэмжээнд 7.0 хувь, Улаанбаатар хотод 7.2 хувьтай гарлаа.
Гадаад бондын өндөр дүнтэй төлбөрүүд хийгдсэн хэдий ч экспортын орлого өсөлттэй, нөгөө талаар мөнгөний хатуу бодлогыг тууштай хэрэгжүүлж байгаатай холбоотойгоор валютын нөөц тогтмол өсөж байна.
Тодруулбал,
Гадаад эрэлт өндөр хэвээр байж, уул уурхай болон түүнээс хамааралтай салбаруудын өсөлт хадгалагдахаар байгаа хэдий ч, зудын нөхцөл байдлаас шалтгаалан хөдөө аж ахуйн салбарын уналт энэ онд үргэлжилж, эдийн засгийн өсөлтийн төлөв муудах хүлээлттэй байна. Суурь төсөөллөөр 2024 онд эдийн засгийн өсөлт 4 хувиас бага гарч болзошгүй. Гэхдээ хөдөө аж ахуйн салбараас бусад салбарын өсөлт 6.0 хувьд хүрэхээр байна.
Инфляц ийнхүү буурч, зорилтын интервалд тогтворжихоор байгаа орчинд мөнгөний бодлогын төлөв удаан хугацаанд хатуу хэвээр хадгалагдах нь эх үүсвэрийн хүү, зээлийн нийлүүлэлтээр дамжин хувийн хөрөнгө оруулалтыг сааруулах, дунд хугацааны эдийн засаг, бизнесийн идэвхжилд сөргөөр нөлөөлөх эрсдэлтэй. Түүнчлэн, зудын нөхцлөөс шалтгаалан малчдын зээлийн эргэн төлөлт доголдож, төлбөрийн чадварын хүндрэлд орох эрсдэл үүсэж болзошгүй байна.
Эдгээр нөхцөл байдлыг харгалзан Монголбанкны Мөнгөний бодлогын хороо бодлогын хүүг 1 нэгж хувиар бууруулах, малчны эргэн төлөлт нь доголдсон зээлд бүтцийн өөрчлөлт хийж, хугацааг сунгах шийдвэрийг гаргалаа. Энэхүү шийдвэр нь инфляцыг дунд хугацаанд зорилтот түвшинд хүргэж тогтворжуулах, эдийн засгийн болон санхүүгийн тогтвортой байдлыг хангах зорилттой нийцтэй болно.
Монголбанкны зүгээс цаашдаа эдийн засгийн сэргэлт, инфляцын төлөв, нийлүүлэлтийн шинжтэй хүчин зүйлс, олон улсад бий болж буй өөрчлөлтүүдтэй уялдуулан мөнгөний бодлогын дараагийн алхмуудыг тухай бүр авч хэрэгжүүлэхээ илэрхийллээ.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
202.126.89.30
Малчин биш хүмүүс бас л хохирч байгаа. Улсаас нэг ч удаа ямар нэгэн тэтгэлэгт орж байгаагүй шүү. Татвараа л харин улам ихсэж ядуурал руу түлхэж байгаа #МАН_АН нэг мөсөн зайлцгаа та нар
Хариулах