ХАР ЖАГСААЛТ: Миеэгомбын Энхболдын сүүлчийн найдвар Ж.Батжаргал

Нэгэн цагт МАН-д төдийгүй Монголын улс төрд "хаан" сэтэртэй байсан фракц бол М.Энхболдын "Hотын фракц". Нэгэн цагт Монголд хэн дарга болох, хэн дэвшихийг дангаар шахуу шийддэг байсан том фракц нэг л мэдэхэд нуран унаж, сөөм сөөмөөр уруудан доройтсоор тун хүнд нөхцөлд байгаа билээ. 

2020 онд МАН-ын дарга У.Хүрэлсүх 32-ын бүлэг буюу М.Энхболдыг огцруулах асуудлыг эсэргүүцсэн гишүүдийн ихэнхийг нь дэвшүүлээгүй. Улмаар шинэ парламент бүрдэж, Л.Оюун-Эрдэнэ МАН-ын дарга болоход ч "Хотын" фракц нар үзээгүй. Өнгөрсөн сард нэр дэвшигчдээ тодруулахад ч М.Энхболдын талын олон хүн нэр дэвшихээр горилж байсан ч дэвшүүлээгүй. Бүр М.Энхболдыг УИХ-ын дарга байхад Ерөнхий сайд байсан Ж.Эрдэнэбатыг ч, Н.Энхболдыг ч дэвшүүлээгүй нь тэдний фракцын хувьд маш том аюул байлаа. 

Тамгагүй, алхгүй, фракцгүй шахуу болсон энэ үед М.Энхболдын сүүлчийн найдвар нь Ж.Батжаргал байх бололтой. 2016 оны үнэмлэхгүй ялалтын дараа  "Хаан" болсон М.Энхболд Ж.Батжаргалыг төрөлх Төв аймгийнхаа Засаг дарга болгосон нь улстөрчийн хувьд М.Энхболдын хүн гэдгийг нь батална. Харин 2020 оны УИХ-ын сонгуулиар М.Энхболдод мандат олдоогүй ч төлөөний хүн Ж.Батжаргал нь сонгогдож дөрвөн жилийн хугацаанд "хэлгүй" юм шиг л ордонд суусан. Саяхан УИХ дахь Байгаль орчин, хүнс, хөдөө аж ахуйн байнгын хорооны даргаар сонгогдсон. Тиймдээ ч сүүлд тариаланчдын асуудлаар хүчтэй дуугарч байсан ч тэгсхийгээд ам нь таглагдсан. МАН-даа хавчигдаж, гадуурхагдсан "хотын" фракц төдийгүй М.Энхболд ч Ж.Батжаргалд найдвар тавьж байгаа нь ойлгомжтой.

Ж.Батжаргалын хувьд Төв аймагтаа бараг л эзэн суучихсан гэхэд болно. Түүнийг засаг даргаар томилогдсон цагаасаа эхлэн Төв аймгийн төрийн албанд өөрийн гэр бүл, ойр тойрныхоо хүмүүээ тавьж, нөлөөгөө тэлсээр ирсэн гэлцдэг. Энгийн нэг жишээ бол өөрийн сонгуулийн менежер Ч.Сарангэрэлийг Төв аймгийн зуун мод сумын засаг дарга бөгөөд Зуун мод хотын захирагчаар томилуулсан. Мөн өөрийн ах, эгч нарынхаа хүүхдүүдийг Төв аймгийн төрийн албаны шат шатны албан тушаалд томилуулсан гэх мэдээлэл ч байдаг билээ. Мөн Төв аймгийн засаг дарга Д.Мөнхбаатар ч Ж.Батжаргалтай хамт “Төв аймгийн морин спорт уяачдын холбоо”-г удирддаг. Ер нь төв аймагт уяачдын холбоо маш чухал үүрэг гүйцэтгэдэг. М.Энхболд ч, одоо УИХ-ын гишүүн байгаа Ж.Батжаргал, Ц.Туваан нар ч уяач билээ. 

Түүнчлэн Ж.Батжаргалыг шүүмжлэх бас нэгэн асуудал байдаг нь Төв аймгийн Засаг даргаар ажиллаж байхдаа хариуцлагагүй уул уурхайтай тэмцэх бус "эвсэж" ажилласаар байсанд нь аймгийн зарим иргэд дургүйцлээ илэрхийлж байв. 

Төв аймгийн Заамар сумд үйл ажиллагаа явуулж байсан "Эко алтан заамар" ХХК-ийн буруутай үйлдлийн улмаас дөрвөн хүний амь эрстсэнийг уншигчид санаж байгаа байх. Ер нь тус компанид удаа дараа хүний амь эрсэдсэн бөгөөд үүнтэй нь холбогдуулан "Эко алтан заамар" ХХК-ийн тусгай зөвшөөрлийг цуцлуулах хүсэлтийг холбогдох яамд нь өгсөн ч Засаг дарга Ж.Батжаргал хөдлөөгүй гэдэг. Нөгөөтэйгүүр "Эко алтан заамар" ХХК-ийг ажиллуулах гэрээг Ж.Батжаргал үзэглэсэн байдаг нь хардлага төрүүлсээр байсан юм. 

Мөн Ж.Батжаргал аймгийн засаг даргаар ажиллаж байхдаа Төв аймгийн Заамар сумын Төмсий багийн нутаг “Түмэнгийн төрөлж” хэмээх газар 15541.08 га газарт ашигт малтмалын тусгай зөшөөрлийг Засгийн газар “Эрдэнэсийн эрэг” хэмээх уул уурхайн сургалт явуулдаг компанид олгосон байдаг. 

Заамар сумын ИТХ болон иргэдийн зүгээс орон нутгийн тусгай хэрэгцээнд бүртгэгдсэн газар учраас тусгай зөвшөөрөл олгохгүй гэдгээ илэрхийлсэн ч тухайн үед Ж.Батжаргал аймгийн ИТХ-ын төлөөлөгчидтэй хуйвалдан лиценз олгох боломжийг хангасан хэмээн Заамар сумын иргэд 2023 оны арваннэгдүгээр сард хэвлэлийн хурал хийж байв. 

Хэдий Ж.Батжаргал хамгийн "ядуу" гишүүдийн нэг хэмээн нэрлэгддэг ч түүний ард олон жил МАН-д хүчтэй байсан "Хотын" фракц бий. Тэд намынхаа томчуудтай "Наймаа, тохироо" хийхийн тулд заавал УИХ-д төлөөлөлтэй байх хэрэгтэй. Тиймдээ ч М.Энхболдын сүүлчийн найдвар нь Ж.Батжаргал болж буй.