О.Баасанхүү ЦЕГ-ын даргаар ажиллахад бэлэн хэмээн сэрүүн зүүдлэв

Хорих ангид саатуулагдаж байсан 21 настай залуу эмнэлэгт хүргэгдэж ирээд нас барсан харамсалтай хэрэг гарсан. Өчигдөр /2024.07.25/ талийгаач О-гийн эгч нар мэдүүлэг авах журмаар эрүүдэн тамласан хэмээн мэдээлэл хийсэн билээ. Монголчуудын өргөн хэрэглэдэг фэйсбүүк, твиттер орчинд ЦЕГ-ын дарга, бригадын генерал Т.Сүхболдыг хариуцлага хүлээн ажлаа өгөхийг шаардсан дүр зурагтай байна. Үүнтэй зэрэгцээд Ардчилсан Намын хуульч О.Баасанхүү ЦЕГ-ын даргаар ажиллахад бэлэн хэмээн жиргэжээ.

Хуулиараа бол ЦЕГ-ын даргыг томилж, чөлөөлөх эрх нь Засгийн газарт бий. Гэхдээ процессын тухайд эхлээд дотоод хэргийн асуудал эрхэлсэн Засгийн газрын гишүүн санал болгоно. Түүний санал болгосноор Засгийн газар томилж, чөлөөлдөг. Тэгэхээр Т.Сүхболдыг чөлөөлбөл, дараагийн даргын нэрийг дотоод хэргийн асуудал эрхэлсэн Засгийн газрын гишүүн буюу Хууль зүй, дотоод хэргийн сайд О.Алтангэрэл Засгийн газартаа санал болгоно гэсэн үг. О.Алтангэрэлийн тухайд Ардчилсан намын гишүүн. Тэр утгаараа өөрийн намаас нэр зүтгүүлэх магадлал тун өндөр юм.

Цагдаагийн албаны тухай хуулийн 20.1-т,  Цагдаагийн төв байгууллагын даргаар цагдаагийн албанд 20-оос доошгүй жил ажилласан, эрх зүйч мэргэжилтэй, удирдах болон мэргэжлийн ажлын дадлага туршлагатай, улс төрийн албан тушаал эрхэлж байгаагүй Монгол Улсын иргэнийг томилно хэмээн заасан байдаг. 

О.Баасанхүүгийн тухайд УИХ-ын гишүүнээр ажиллаж байсан. Тэгэхээр дээрх хууль эрх зүйн үндэслэлийг хангахгүй байгаа юм. ЦЕГ-ын дарга болно гэдэг нь сэрүүн зүүд биз ээ. 

Э.БУЛГАН