О.Насанбурмаа: Монголд стандартын дагуу баригдсан ганц ч бэлтгэлийн бааз байдаггүй

Монгол Улсын гавьяат тамирчин О.Насанбурмаа "Парис 2024" олимпын наадамд эх орноо төлөөлөн оролцож, хүрэл медалын төлөө барилдсан Д.Отгонжаргалын талаар сэтгэгдлээ сошиал хуудаснаа илэрхийлжээ. 

Тэрээр "Бид бүгд дүүгээ медаль авчхаасай гэж мөн ч их залбирч хүлээж байлаа. Гэхдээ болсонгүй дээ. Дүү минь чадлынхаа хэрээр эцсээ хүртэл сайхан л үзлээ. Ямар амьдралаас гарч ирж яаж өөрийгөө золиосолж, ямар их тэвчээр гаргаж, хайртай дуртай спортдоо амжилт гаргах гэж, эх орныхоо нэрийг өндөрт өргөж, аав ээж, ард түмнээ баярлуулахын тулд тэмцэж байсныг нь бодохоор дотор харанхуйлаад байх юм. Медаль авчихвал өөрийнх нь амьдрал нь жоохон ч гэсэн дээшлэх байх гээд л залбирч суулаа.

Хаа байсан Зурагтын эцсээс өвлийн хүйтэн, зуны халууныг ажралгүй Нисэхийн тойрогт нэг ч өдөр таслалгүй 10 жил бусдаас илүү шаргуу хөдөлмөрлөснийхөө үр дүнд, анхныхаа олимпод оролцож, дэлхийн аварга шалгаруулах тэмцээнд хоёр мөнгө, нэг хүрэл медаль, гурван жил дараалал хүртсэн жаахан дүүгээрээ бахархаж байна. Энэ жил 22-хон настай дүүг минь олон амжилт, ирээдүй хүлээж байгаа шүү. Ялагдал болгон сургамж болж, Ялалт бүр нь урам болно оо миний дүү. 

Отгоо дүү минь нэг өвдөгний чагтан холбоос тасарсан, нөгөө өвдөг нь менескны урагдалтай байгаа. 2, 3 жил хөлөө чирээд л эмчилгээ хийлгэж, байнгын үе мөч чангалах дасгал хийж, аргацаасаар энэ олимпыг зорьсон. Даанч санасандаа хүрсэнгүй. Одоо ирээд хамгийн түрүүнд хагалгаа хийлгэх хэрэгтэй. Ядахдаа эрүүл байх чухал байна. 

Дэлхийн гурван медальтай тамирчин өнөөдрийг хүртэл өөрийн гэсэн орох оронгүй л явж байна энэ тал дээр анхаармаар юм. Энэ охинд амьдралын баталгаа хэрэгтэй. Санаа зоволтгүй бэлтгэл хийхэд энэ бол маш том хөшүүрэг.

Шигшээ багийн тамирчид бэлтгэл хийдэг Спортын ордны заалны дэвжээг хүртэл солимоор байна. Монгол Улсад олон улсын стандартын дагуу баригдсан төвлөрсөн ганцхан бэлтгэлийн бааз өнөөдрийг хүртэл байдаггүй гэж бодохоор л гол харламаар байна. Нэмж хэлэхэд чөлөөтийн есөн тамирчнаас дөнгөж хоёр нь тэмцээнээ өндөрлүүллээ. Ахиад долоон асаалттай танк байгаа шүү манайхаан. Бүх тамирчдаа мохоолгүй урам хайрлаж, дэмжье гэж уриалъя даа баярлалаа" хэмээжээ.