Эгийн голын усан цахилгаан станцын хувь заяа бүрхэг байна

 “Технологи, Хөрөнгө оруулалт Монгол-2017” олон улсын үзэсгэлэнгийн хүрээнд “Сэргээгдэх эрчим хүч” сэдэвт хэлэлцүүлэг боллоо. Энэ үеэр Эгийн голын усан цахилгаан станцын төслийн нэгжийн ажлын үйл явцыг танилцуулсан юм. Эгийн голын усан цахилгаан станц нь Булган аймгийн Хутаг-Өндөр сумын нутагт баригдахаар төлөвлөгдөөд байгаа ч олон шалтгааны улмаас өнөөдрийг баригдаж чадаагүй.  

Тухайлбал 2006 онд Хятадын хөнгөлөлттэй зээлээр хэрэгжүүлэхээр шийдвэрлэсэн ч Засгийн газар солигдон нэлээд хэдэн жил зогсонги байдалд орсон. Ингээд 2011 оноос дахин төслийн нэгжийг байгуулан ажиллаж ТЭЗҮ-ийг нь англи, монгол хэл дээр шинээр хийлгээд байгаа аж. Төслийн нийт өртөг нь шинэ ТЭЗҮ-гээр 827 сая төгрөг байх тооцоо гарсны 48 хувь нь барилга, 30 хувь нь тоног төхөөрөмж, үлдсэн нь зам, байгаль орчны нүүлгэн шилжүүлэлтэд зарцуулагдах юм байна.

Төслийн нэгжийн Инженер, техникийн албаны дарга Д.Будхүү “ТЭЗҮ-ийг бүрэн боловсруулж, тендерийн бичиг баримтыг гүйцээгээд төслийн ажлыг эхлүүлэхэд бэлэн болчихсон байгаа. Эгийн голын станц Байгал нуурын гидрогеологид хэрхэн нөлөөлөх талаар ярицлах эрдэмтдийн санал солилцох уулзалт болох юм. Уулзалтын үр дүнгээс хамаарч төсөл хэрэгжих эсэх нь тодорхой болно.

Бид олон улсад нэр хүндтэй компаниар ТЭЗҮ-ээ хийлгэсэн. Үүнийг боловсруулж байх явцад Оросууд хэл ам хийгээд, бид тэр компанид санал тавьж нэмэлт судалгаа хийлгэсэн. Судалгаагаар Байгал нуурт нөлөөлөх нөлөөлөл нь 0.023 хувь гэж гарч байгаа юм. Зөвхөн ус хураах үед л ийм нөлөөтэй. Ус хураасны дараа ямар ч нөлөөгүй. Бид усаа ашиглахгүй шүү дээ. Турбинээр эргүүлээд буцаагаад гоожуулна. Нэг литр ч ус авч үлдэхгүй.

Төслийг хэрэгжүүлэхээр Хятадаас авах хөнгөлөлттэй зээлийн шийдвэр УИХ-аар батлагдсан ч сонгуулийн жил золгосон. Бид Оросуудаар хүлээн зөвшөөрүүлж чадахгүй байсаар байгаад энэ мөнгөний асуудал хаашаа явж байгаа нь мэдэгдэхгүй болчихлоо” гэсэн юм.

Б.Сондор