Улаанбаатар хотын газар олголтоор Хяналтын сонсгол хийх үү

УИХ 2024 оны сонгуулийн өмнө “Улаанбаатар хотын газар олголтын" асуудлаар хянан шалгах түр хороо байгуулж, сонсгол хийх асуудал яригдсан ч амжилгүй сонгуультай золгож, улмаар зогсонги байдалд орсон билээ. Тодруулбал, газар олголт, уул, уурхайн лиценз олголт гэх зэрэг гурван Хяналтын сонсгол хийхээр төлөвлөсөн ч уул уурхайн лиценз олголтоор л сонсгол зохион байгуулж амжсан байдаг.

Тэгвэл Ц.Баатархүү нарын 35 гишүүн “Улаанбаатар хотын газар олголтын" асуудлаар хянан шалгах түр хороо байгуулах санал гаргасан бөгөөд өчигдөр энэ саналыг  Байгаль орчин, хүнс, хөдөө аж ахуйн байнгын хороогоор хэлэлцэх байсан ч ирц хүрээгүй шалтгаанаар хойшилсон юм.

Хянан шалгах түр хороо байгуулагдвал,

• Нийслэлийн Иргэдийн Төлөөлөгчдийн хурал, Нийслэлийн Засаг дарга болон холбогдох захиргааны байгууллагын гаргасан газар олголттой холбоотой 1992-оос 2025 оны шийдвэрүүд;
• Газрын тухай хуулийн хэрэгжилт, газрыг өмчлөл, эзэмшил, ашиглалтын зориулалтаар олгосон байдал;
• Нийтийн эзэмшлийн газар, ногоон байгууламж, гол усны хамгаалалтын бүс зэрэг хуульд хориглосон бүсэд газар олгосон эсэх;
• Ерөнхий боловсролын сургууль, сургуулийн өмнөх боловсрол, эмнэлгийн эдэлбэр газарт газар олголт хийгдсэн байдал;
• Газар олголтын ил тод байдал, мэдээллийн сангийн бодит байдал;
• Одоогийн эрх зүйн орчин, хэрэгжилтийн зөрчил, цаашид өөрчлөлт оруулах шаардлага зэргийг судлан хяналт шалгалт хийх, санал, дүгнэлт гаргах юм.