Б.Пүрэвдорж: Ирэх сард ТЭТГЭВРИЙН ХУУЛИЙГ хэлэлцэхгүй бол жагсаал хийнэ шүү

УИХ-ын чуулганы Пүрэв гарагийн хуралдаан эхэллээ. Хуралдааны үеэр УИХ-ын гишүүн Б.Пүрэвдорж горимын санал гаргаж, тэтгэврийн доод хэмжээг тогтоохдоо долоон жилийн цалингийн дунджаар биш таван жилээр тогтоох хуулийн төслийг яаралтай хэлэлцэж өгөх талаар байр сууриа илэрхийллээ. 

Тэрбээр "Хаврын чуулганаар хэлэлцэх асуудал бага байх шиг байна. Би МАН-ын овсгоотойхон шиг гишүүн байсан бол 500 мянгаас нэг сая хүртэлх тэтгэврийг 15 хувиар, 1-2 сая төгрөгний тэтгэрийг 10 хувиар 2 саяаас дээш бол 5 хувиар нэмээд тэтгэврийн зөрүүг ойртуулах арга хэмжээ авах байсан. Даанч тийм гишүүн алга. Дандаа дарга нараа хардаг л гишүүд байна гэж МАН-д би хэлсэн. Нэг талаар магтсан нөгөө талаар шүүмжилсэн. Иргэд тэтгэврийн доод хэмжээг 500 мянган төгрөг болгосонд баяртай байгаа. Тэгэхдээ бид нарын яриад байгаа тэтгэврийн доод хэмжээг тогтоохдоо 7 жилийн цалингийн дунджаар биш 5 жилийн дунджаар тогтоох энэ хуулийн төслийг яаралтай хэлэлцэж өгөөч ээ. Дөрөвдүгээр сарын хэлэлцэх асуудалд оруулж өгөөч ээ.Тэр хуулийнд бүр тэтгэвэр тогтоохдоо 10 жилийн асуудал яригдаж байгаа. Тийм ард иргэдийн эсрэг хууль шийдэж болохгүй. Энэ хуулийг яаралтай хэлэлцэж өгнө үү. Дөрөвдүгээр сарын хэлэлцэх асуудалд оруулахгүй бол Баянхонгор аймагт эхний ээлжинд УИХ-ын даргын тойрогт жагсаал зохион байгуулна. Дараа нь Хэнтий аймагт Ерөнхий сайд, Ерөнхийлөгчийн тойрогт жагсана. Дараа нь байнгын хороо хариуцдаг М.Оюунчимэг гишүүний Чингэлтэй дүүрэг дээр жагсаал зохион байгуулна шүү. Ахмадуудтай цуг жагсана" гэв.