ДАТА: Эдийн засаг хүндрэлтэй байгаа ч Дундговь аймгийн Сайнцагаан сумд 13 тэрбумаар усан бассейн барина

Коронавирус цар тахлын улмаас дэлхий дахины эдийн засгийн нөхцөл байдал хүндэрсэн. Манай улсын хувьд ч хил хаагдаж, бараа бүтээгдэхүүний импорт, экспорт зогсонги байдалд орсон. 

Үүний дараа ОХУ болон Украины асуудал даамжирч дэлхий дахиныг хамарсан асуудал болж, улмаар манай хойд хөрш ОХУ-д дэлхийн олон орон эдийн засгийн хориг арга хэмжээ авсан юм. 

Монгол Улсын экспорт хумигдаж, доллартой харьцах төгрөгийн ханш уналтад орж эхэлсэн. Инфляц ч 14.2 хувьд хүрч өргөн хэрэглээний бараа бүтээгдэхүүний үнэ эрс нэмэгдсэн. Ингэснээр засгийн газар төдийгүй ард иргэд ч хүнд нөхцөл байдалтай тулгарч байна. 

Үүнтэй холбогдуулан УИХ-ын дарга Г.Занданшатар ч "Дэлхий дахинаа үүсээд буй нөхцөл байдлын Монголд туссан "сүүдрийг" ойлгож, улс төрийн хүчнүүд асуудлуудыг хэт улс төржүүлэхгүй, гадаад харилцаа, олон улсын байдалд туйлшралгүй Монгол Улсын энхийг эрхэмлэсэн, олон тулгуурт гадаад бодлогын зарчмыг хүндэтгэж, нэг санаа бодолтой байх цаг үе тулгарч байна. Хүнд цаг үе тулгарч байна. Хамтын хүчээр даван туулна. Дотооддоо үймж, нийгэмд буруу зөрүү ойлголт өгөхгүй байх дээр дор бүрнээ анхаарна уу.

Хамтын хүчээр, нийтээрээ хүчээ нэгтгэж байж хямрал, хүндрэлийг даван туулна гэдгийг хаа хаанаа ойлгох хэрэгтэй. Хямрал гэдэг үгийн ард боломж бас байдгийг санаж, Засгийн газар хэт үймэлгүй, бас хэт тайвшралгүйгээр оновчтой, хурдтай шийдвэр гаргаж "Шинэ сэргэлтийн бодлого"-оо тооцоо судалгаатайгаар, олон нийтийн санаа бодолд нийцтэйгээр хэрэгжүүлнэ хэмээн итгэж байна" хэмээн хэдэн хоногийн өмнө хэлж байв. 

Мөн өнгөрөгч долоо хоногт иргэд төв талбай дээр тулгамдаж буй асуудлаа төрд хүргэхээр олноороо жагссан бөгөөд дийлэнх иргэд нь төрийн байгууллагууд өөрсдөө хэмнэх ёстой, ашиггүй зардлаа танах ёстой хэмээж байв. 

УИХ, Засгийн газрын төвшинд ч зардлаа хэмнэх, төсвөө танах, үр ашиггүй зардал гаргахгүй байх талаар ярьж байгаа. Гэсэн ч энэ яриа доод шатандаа хэрэгжихгүй байгааг төрийн байгууллагуудын зарлаж буй тендерүүдээс харж болно. 

УБЦТС ТӨХК-ийн 80 сая төгрөгөөр бичгийн цаас авах, 400 сая төгрөгөөр тавилга авах зэрэг үр ашиггүй тендерүүд зарлагдсаар байгаа нь төрийн байгууллагууд хэмнэж чадаж байна уу үгүй юу гэдэг асуудал гарч ирнэ. 

Үүний нэгэн жишээ нь Биеийн тамир спортын услын хороо, Төрийн худалдан авах ажиллагааны газраас зарласан 13 тэрбум төгрөгөөр Дундговь аймгийн Сайнцагаан сумд баригдах Усан бассейн бүхий спорт цогцолбор барих тендер юм. Тэгвэл тус 13 тэрбумын хоёр тэрбумыг энэ онд улсын төсвөөс санхүүжүүлэх бөгөөд эдийн засаг хүндрэлтэй энэ үед усан бассейн хэрэгтэй юу ААН, иргэдийн хөдөлмөр эрхлэлтийг дэмжих хэрэгтэй юу гэдэг асуудал гарах юм. 

Татвар төлөгчдийн төлсөн мөнгийг ийм цаг үед энэ мэт шаардлагатай эсэх нь эргэлзээтэй бүтээн байгуулалт, төсөл хөтөлбөр, зөвлөх үйлчилгээ гэх мэт үрэлгэн зардал гаргасаар байгаагийн сөрөг нөлөөг эргээд татвар төлөгч, ард түмэн л нуруундаа үүрнэ.