СУРВАЛЖИЛГА: Шинэ ургацын төмс, хүнсний ногооны үнэ буурч байна

Наадмын өмнөхөн хүнсний ногооны үнэ тэнгэрт хадаж иргэдийн дургүйцлыг төрүүлсэн билээ. Импортын хүнсний ногооны татварыг УИХ-аас нэмсэн нь айл өрхийн амьжиргааны зардалд дарамт учруулсан нь үнэн. Иргэдийн хувьд дотоодын хүнсний ногооны үнэ хоёроос гурав дахин нэмэгдсэнд бухимдалтай байсан юм. Харин наймдугаар сарын 17-нд “Алтан намар-2022” хүнсний ногооны худалдаа болж өнгөрснөөс хойш хүнсний ногооны үнэ буужээ.

Нийслэлийн статистикийн газраас 2022 оны наймдугаар сарын 24-ний өдөр хүнсний бараа бүтээгдэхүүний үнийн ажиглалт хийжээ.

Дотоодын төмс, хүнсний зах, дэлгүүрт 1300-1700 төгрөгийн үнэтэй байна. Хамгийн хямд буюу 1300 төгрөгөөр “Хүчит шонхор” зах, “Баянзүрх” захад, харин хамгийн өндөр буюу 1700 төгрөгөөр “Оргил” супер маркетад худалдаалж байна. Дотоодод  тарьж ургуулсан луувангийн дундаж үнэ 2022 оны наймдугаар сарын 19-нд 3454 төгрөг байсан бол түүнээс хойш 2022 оны наймдугаар сарын 24-нийг хүртэл тогтмол 2904 төгрөгийн дундаж үнэтэй байна. Харин нарийн ногоо 3500-10000 төгрөг болсон байна.

Ингээд хүнсний ногооны үнэ ханш, иргэдийн худалдан авалтын талаар сонирхохоор “Баянзүрх” хүнсний захыг зорилоо.

Иргэн О: Наадмаар бол үнэ дийлдэхээргүй өссөн. Тэр үеэр хүнсний ногоо аваачгүй, авахгүй байхаар шийдсэн. Цалин, тэтгэврээ нэмэхгүй байж үнийн хөөрөгдөл хэн хэндээ л зовлонтой шүү дээ. Одоо харин арай гайгүй буурсан байна. Гэхдээ л тэтгэврээрээ амьдардаг над шиг хүмүүст хэцүү л байна.

Иргэн Б: Хүнсний ногооны үзэсгэлэн дээр бүр хямд байсан санагдаж байна. Одоо хүүхдүүдийн хичээл сургууль орох гээд бэлдэх юм зөндөө. Зарим газруудад бол нарийн ногоо үнэтэй л байна.

Хүнсний ногооны худалдаа эрхлэгч иргэн Ө: Өмнө нь хүмүүсийн худалдан авалт тогтвортой байдаг байсан. Наадмын өмнө бол хүмүүс бараг л ногоо аваагүй дээ. Одоо бол иргэдийн худалдан авалт яахав дээ л байна. Үнийн хувьд нэлээн буусан. Төмс 1000 гарантай байгаа. 

Д.Анударь