Зайгаа тавьж өгдөггүй “ХӨГШИН УЛС ТӨРЧ” Х.Бадамсүрэнгээр Чөлөөт бөхийн холбоо дутсан уу ?

Монголын чөлөөт бөхийн холбооны ээлжит бус их хурал өнгөрсөн 19-ний өдөр удирдах зөвлөл болон Ерөнхийлөгчөө сонгохоор хуралдлаа.

Тус хурлаар  “Эрдэнэт үйлдвэр”-ийн Ерөнхий захирал Х.Бадамсүрэнг Монголын чөлөөт бөхийн холбооны ерөнхийлөгчөөр сонгосон юм.

Тэтгэврийн насанд аль хэдийн хүрсэн Х.Бадамсүрэн 1980 оноос хойш өнөөдрийг хүртэл төрийн өндөр албан тушаал хашсаар ирсэн.  Монголын төрд 40 гаруй жил ажилласан Х.Бадамсүрэн дараа үедээ зайгаа тавьж өгөлгүй “Эрдэнэт үйлдвэр”-ийн захирлаар ажилласаар, бүр цаашлаад чөлөөт бөхийн холбоог удирдахаар болжээ.

Ер нь урдах ажлаа хангалттай хийж чадахгүй байгаа төрийн өндөр албан тушаалтнууд энд тэндхийн спортын холбоод, ТББ-ын удирдах зөвлөл, дарга, ерөнхийлөгчийн албанд горилох сонирхолтой байдаг нь нууц биш.

Х.Бадамсүрэнгийн хувьд “Эрдэнэт үйлдвэр”-ийн захирлаар томилогдсоноосоо хойш олон асуудалд нэр холбогдсоор ирсэн. Тодруулбал охиныхоо сургалтын төлбөр 102 сая төгрөгийг байгууллагаасаа төлүүлсэн, 20 сая төгрөгийн унадаг дугуй авсан, хагас тэрбумаар машин авах тендер зарласан гээд түүний “балаг” дуусахгүй.

Х.Бадамсүрэн Чөлөөт бөхийн холбооны ерөнхийлөгчөөр сонгогдсон нь үнэхээр тус спортоо хөгжүүлэх сэтгэлтэй дээ юу улс төрд “барьцаа ахиулах” зорилготой юу.

Чөлөөт бөхийн спортоор хичээллэж байсан эсэх нь ч эргэлзээтэй Х.Бадамсүрэн ийнхүү 100 хувийн саналаар Чөлөөт бөхийн холбооны Ерөнхийлөгчөөр сонгогдлоо. Өдгөө гавьяаныхаа амралтад гарсан байх ёстой Х.Бадамсүрэнгээр Чөлөөт бөхийн холбоо дутсан уу? Зайгаа тавьж өгдөггүй улс төрч Х.Бадамсүрэнгээр удирдуулсан Чөлөөт бөхийн холбоо цаашид хэрхэхийг цаг хугацаа харуулах биз.