III цахилгаан станц Туул голд хаягдал ус нийлүүлсэн асуудлаар БОАЖЯ шалгалт хийлээ

Хаягдал ус зөвшөөрөлгүй байгальд нийлүүлсэн зөрчлийн дагуу 2022 оны 04 дүгээр сарын 20-ны өдөр  дулааны III дугаар цахилгаан станц дээр БОАЖЯ-аас хяналт хийсэн байна.

Шалгалтаар станцын ачаалал нэмэгдэж, бүрэн хүчин чадлаар ажиллаж байгаагийн улмаас хаягдлын сангийн усны төвшин огцом нэмэгдэж, хаягдлын сан болон тунгаах сангийн далан сэтрэх, био мембран цоорох эрсдэл үүссэн байна.

Ослын нөхцөл байдал үүссэний улмаас бага оврын цэвэрлэх байгууламжаар дамжуулан 2022 оны 04 дүгээр сарын 17-20-ны өдрүүдэд хаягдал усыг Туул голд нийлүүлсэн байна.

Тус зөрчлүүдэд үндэслэн БОАЖЯ-аас холбогдох байгууллагад дараах шаардлагыг хүргүүллээ.

• Стандартаас давсан агууламжтай хаягдал усыг байгальд нийлүүлж буй тохиолдолд Байгаль орчин, аялал жуулчлалын Сайдын 2019 оны А/635 дугаар тушаалаар батлагдсан “Ус бохирдуулсны нөхөн төлбөрийг шатлан өсгөх хэлбэрээр ногдуулах журам”-ын дагуу төлбөр тооцох болохыг анхаарууллаа.
• Хаягдал усыг хүрээлэн буй орчинд нийлүүлэхдээ “Хүрээлэн байгаа орчин, усны чанар, хаягдал ус,  Ерөнхий шаардлага MNS 4943:2015” стандартын шаардлагыг мөрдлөг болгоно.