Улсын мөнгөөр "туйлсан" Э.Бат-Үүл, Н.Батбаяр нарт иргэдийг төлөөлөх ёсзүй бий юу?

2020 оны 05 сарын 20

Улс төрийн нам, эвслүүд УИХ-ын 2020 оны сонгуульд нэр дэвшигчдээ өнгөрөгч долоо хоногт албан ёсоор зарласан. Энэхүү жагсаалтууд дунд авлига, албан тушаалын хэрэгт холбогдож хуулийн байгууллагад шалгагдаж хэрэг нь баримтаар нотлогдож, шүүхээр орж буй хүмүүс байгаа нь ихээхэн анхаарал татаж байна. Бүр тохиролцож чадвал өнөөдөр намд элсээд маргааш нь сонгуульд нэр дэвшиж болдгийг ч бид өнгөрсөн өдрүүдэд хангалттай харав.

Эндээс хамгийн ноцтой нь УИХ-ын сонгуульд дэвших эрхээ өвөртлөөд байгаа нэр дэвшигчдээс цөөнгүй нь албан тушаал, авлига хээл хахууль, залилангийн хэрэгт шалгагдаж, хэрэг нь баримтаар нотлогдож яллагдагчаар татагдаад байгаа юм.  Уг жагсаалтад багтсан улстөрчдийн хэргийг бид ямар шатандаа явааг тодруулан цувралаар хүргэж байна. Энэ удаа хөгжлийн банкны хөрөнгөөр “туйлсан” Э.Бат-Үүл, Н.Батбаяр нарт холбогдох хэргийг онцолж байна.

Э.Бат-Үүл, хүүгийн хамт холбогдсон 13.5 тэрбумын хэргийг шүүх хурал 6 сарын 8-нд болно

Хөгжлийн банкнаас санхүүжүүлсэн олон төсөл хөтөлбөрийн хөрөнгөөс завшсан байж болзошгүй хэрэгт нийслэлийн Засаг дарга асан Э.Бат-Үүлийг яллагдагчаар татаад байгаа. Тодруулбал, гэр хорооллын дахин төлөвлөлтөд шалгарсан, Э.Бат-Үүлийн хүү Б.Чулуудайгийн “Гранд лайн” компанийн зээлийн төлбөрийг төлөхийн тулд “Бэрэн групп” ХХК-д мөнгө шилжүүлсэн бөгөөд АТГ-аас тус группийн санхүүгийн бичиг баримтыг шалгаад ТОСК-аас шилжүүлсэн есөн тэрбум төгрөгийн тодорхой хэсгээр “Гранд лайн” ХХК-ийг худалдаж авсан төлбөрийг барагдуулсныг тогтоосон юм. 

2015 онд А.Гантулга ТОСК-ын захирлаар ажиллаж байхдаа “Буянт-Ухаа 2” хорооллын санхүүжилтээс мөн оны наймдугаар сард таван тэрбум, есдүгээр сард дөрвөн тэрбумыг “Бэрэн групп” рүү ямар нэг хүү, барьцаагүйгээр шилжүүлсэн байдаг. Энэ нь Э.Бат-Үүлийн дарамт шахалтаас болсон гэж үзэх үндэслэлтэй. Түүний хүү Б.Чулуудай захирлаар нь ажиллаж байсан “Гранд лайн” компани Баянзүрх дүүргийн Амгалан орчимын хэсэгчилсэн ерөнхий төлөвлөгөөний дагуу гэр хорооллын дахин төлөвлөлтийн төсөл хэрэгжүүлэх болж, “Улаанбаатар” банкнаас 3.3 тэрбум, Туркийн “216 Япи Үрэти Худалдаа” компаниас 1.2 тэрбум төгрөгийн зээл авсан нь нэг хэсэг дуулиан болсон. Энэ зээлээ төлөхийн тулд Б.Чулуудай нь компаниа “Бэрэн групп”-ийн Б.Мөнхтөрд нэг их наяд гаруй төгрөгөөр худалдах гэрээ байгуулж, хувьцаагаа 100 хувь шилжүүлсэн аж.

Энэ талаар прокурорын байгууллагын эх сурвалж “Нийслэлийн Засаг дарга бөгөөд Улаанбаатар хотын захирагч Э.Бат-Үүл эрх мэдлээ урвуулан ТОСК-ын гүйцэтгэх захирал А.Гантулгыг удаа дараа дарамталж, Хөгжлийн банкнаас орон сууц барих зориулалтаар олгосон зээлийн хөрөнгөөс есөн тэрбум төгрөгийг “Бэрэн групп” рүү шилжүүлэх шийдвэр гаргуулсан байдаг. Улмаар тус групп нь Э.Бат-Үүлийн хүү Б.Чулуудайгийн эзэмшдэг “Гранд лайн” ХХК-ийг 5.5 тэрбум төгрөгөөр худалдан авч улсын төсөвт их хэмжээний хохирол учруулсан хэрэгт аав, хүү хоёрыг яллагдагчаар татсан” гэсэн юм.

Эх сурвалжийн бидэнд өгч буй мэдээллээр шүүх хурал ирэх зургадугаар сарын 8-нд товлогдоод байгаа аж. 

Улсад хоёр тэрбумын хохирол учруулсан Н.Батбаярын хэргийг шүүх хурал удахгүй товлогдоно

Эдийн засгийн хөгжлийн сайд асан Фортуна Н.Батбаяр Хөгжлийн банкны хэргээр хуулийн байгууллагад удаан хугацаанд шалгагдаж, хэрэг нь хэдийнэ олон нийтэд ил болсон. Түүний хувьд албан тушаалын хэрэгт холбогдож, хуулийн байгууллагын хаалга татаж эхэлсэн үеэс улс төрийн карьер нь дуусч, охиноо зүтгүүлж эхэллээ хэмээн хэвлэл мэдээлэл, сошиал орчинд шуугисан ч УИХ-д дахин нэр дэвшихээр намаасаа мандат авч чадсан сүйхээтэй эр. 

Түүний хэргийг эргэн сануулбал, Н.Батбаярыг эрх мэдлээ хэтрүүлснээр улсад хоёр тэрбум 35 сая гаруй төгрөгийн хохирол учруулсан хэмээн буруутгасан билээ. Тодруулбал, тэрбээр сайдаар ажиллаж байхдаа Засгийн газрын 2013 оны 124 дүгээр тогтоолд засвар хийж, Халзанбүргэдтэй-Солонготын даваа чиглэлийн 100 км авто замыг шинээр барих замын жагсаалтад оруулснаар дээрх хэмжээний хохирол учирсан гэж үзэж буй. Дээрх чиглэлийн замыг УИХ-ын гишүүн асан Б.Гарамгайбаатарын хамаарал бүхий “Мон роуд” компани барихаар шалгарсан байдаг.

АТГ-ынхан Н.Батбаярт холбогдох хэргийг шалгаж дуусаад гэм буруутай, эсэхийг нь тогтоолгохоор яллах дүгнэлт үйлдүүлж, шүүхэд шилжүүлээд байна. Прокурорын байгууллагын эх сурвалж “Хэргийг шалгах явцад тусгай мэдлэг бүхий шинжээчдээр замын барилгын ажлын төсвийг шалгуулж, хохирлын хэмжээг тогтоолгохын тулд улсын төсвөөс тодорхой хэмжээний зардал гаргасан. Н.Батбаярт холбогдох Хөгжлийн банкны хөрөнгийг шамшигдуулсан үйлдлийн гэм бурууг шүүхээр тогтоолгохдоо мөрдөн байцаах ажиллагааны явцад гарсан зардлыг түүнээс гаргуулах шаардлагатай” гэдгийг тодотгож байсан нь энэ хэргийн цар хүрээг илтгэнэ.

Товчхондоо, Н.Батбаяр нарыг шалгаж дууссан бөгөөд түүний шүүх хурал хэзээ товлогдох цаг хугацааны асуудал болоод байгаа.

Ийнхүү улсын төсөвт их хэмжээний хохирол учруулсан хэргүүдийг АТГ-ынхан шалгаж, гэм буруутай байж болзошгүй хүмүүсийг яллагдагчаар татсан боловч шүүх, прокурорынхон шийдвэрлэлгүй удааширч байгаад олон нийт шүүмжлэлтэй хандаж байна.

Уг нь шүүх, прокурорын байгууллагынхан энэ мэт олны анхаарал татсан, улсад онц их хэмжээний хохирол учруулсан хэргийг шуурхай шийдэж, гэм буруутай этгээдүүдээр Монголын төрд учирсан хохирлыг нөхөн төлүүлбэл шударга ёсонд нийцэх юм. Тэдэнд дахин иргэдийг төрд төлөөлөх ёсзүй бий юу? 

Үргэлжлэл бий.....

Г.Сар
 

Сэтгэгдэл (3)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
2020 оны 05 сарын 21
103.9.90.130
иргэн

Луйварчид ял авахаас айж аврал эрэн, хоргодох байр хайн УИХ -ын гишүүн болхоор зүтгэлээ дээ яахыгаа ард түмэн л мэдэж дээ

2020 оны 05 сарын 21
103.9.90.130
үнэн

Шүүхээс зугтах гэж байгаа луйварчидыг иргэд олон сонгохгүй байлгүй дээ

2020 оны 05 сарын 21
70.181.127.87
Irgen

Shyyhed shiutgelee hyleej baigaa neg devshigchdiig songuulid ner devshihiug horigloh heregtei.ih hural luivarchdiin orognoh gazar boljee.