Онлайн казино: 4 сая рубль, эхнэр хүүхэд, орон сууцаа алдсан эрийн сургамжтай түүх

2020 оны 07 сарын 02

2009 оны долдугаар сарын 1-нд баталсан хуулиар Орос улсад казино тоглоомын газруудыг хаах шийдвэр гарсан байдаг. Гэсэн ч мөрийтэй тоглоомоос зодог тайлахыг хүсээгүй хүмүүс онлайнаар казино тоглож эхэлжээ. Ингээд ЗӨВ.МН интернетээр казино тоглож гэр бүр, нэр хүнд, 4 сая рубль /159,120,000 МНТ/ , тэр бүү хэл орон сууцаа хүртэл алдсан нэгэн орос эрийн сургамжтай түүхийг толилуулж байна. 

2018 оны арван хоёрдугаар сараас эхлэн онлайн казино тоглож эхэлжээ. Анх найзтайгаа хэрхэн орлогоо нэмэгдүүлэх талаар ярьж суухад найз нь онлайн казино тоглохыг санал болгосон байна. Залуу эрийн удамд мөрийтэй тоглоомд донтогсод бишгүй л байв. Иймээс нэг донтчихвол өөрийгөө татаж авж чадахгүйд хүрнэ гэдгээ ч залуу мэдэж байлаа. Гэсэн ч амар хялбараар орлогоо өсгөхийн тулд үзээд алдахаар шийджээ. 

Оросод мөрийтэй тоглоом хориотой гэдгийг дээр дурдсан. Цахим гэмт хэрэгтэй тэмцэх хэлтсийн ажилчид онлайн мөрийтэй тоглоомын сайтуудыг цаг үргэлж хаадаг ч сайтын эзэд өөр нэртэй ижил сайт ахиад л нээчихдэг байна. 

Тод өнгө, сайхан хөгжим эгшиглэсэн мөрийтэй тоглоомын сайтуудруу ороод л хүн тоглоом тоглож, бооцоо тавихыг хүсдэг. Онлайнаар тоглогчдын дунд хамгийн алдартай тоглоом бол слот /slot/ тоглоом юм. Та мөрий байршуулж, товчлуур дарахад зураг, тэмдэгттэй дамар эргэлдэж таны хонжворыг дэлгэцэнд харуулна. Хэрэв 3 ижил дүрс таарвал та мөрийгөө авах бөгөөд үгүй бол алдсан гэсэн үг юм.  Слот тоглоомуудад 5 рублиэс / 200МНТ/ 10,000 рубли /397,000МНТ/ хүртэл мөрий тавьж болно. Заримдаа 50,000 /2,000,000МНТ/  рублийн мөрий тавих тоглоомчид ч байдаг. 

Онлайнаар тоглоход заримдаа бонус тоглоомын үе гарч ирдэг. Хэрэв бонус тоглож хожсон болсон бол та мөрийгөө 30-50 дахин үржүүлж авах боломжтой. Харин энгийн казино тоглоомын төвд хамгийн ихдээ 10 дахин үржүүлж авах боломжтой байдаг. Үүгээрээ онлайн казино энгийн казино тоглоомын төвүүдээс давуу талтай байдаг байна. 

Слот тоглоом бүрд ахин тоглосон тоглогчдын тоо байдаг. Нийт мөрийтэй тоглоомчдын 95-96%  нь дахин тоглодог гэсэн тооцоо байдаг. Аливаа зүйлд донтоно гэдэг хэцүү. Донтсон зүйлээсээ гарна гэдэг бүр хэцүү. Мөрийтэй тоглоомчид бүхнээ алдсан ч зээл авч, үргэлжлүүлэн тоглосоор байдаг. 

Би одоо 30 настай. Би мөрийтэй тоглоомд донтохоосоо өмнө сарын 50,000 рублийн /1,989,000МНТ/ цалинтай, үзэсгэлэнтэй эхнэртэй, өөрийн гэсэн орон сууцтай нэгэн байлаа. Би мөрийтэй тоглоомд донтож, амьдралаа там болгоно гэдгээ зүүдлээ ч үгүй явлаа. 

Эхэндээ зүгээр л зугаацах гэж тоглож эхэлсэн. 5,000 / 198,000МНТ/ рублиэр анх мөрий тавьж ердөө 30 минутын дотор 7,000 /278,000МНТ/ рубль болгож өсгөж чадсан. Үүндээ урамшиж, цаг үргэлж мөрийтэй тоглох болсон. 

Тоглож эхэлсэн эхний 7 хоног 4,000-5,000 рублийг /159,000-198,000МНТ/ 20,000-30,000 /795,000- 1,193,400МНТ/ болгож өсгөж чадсан. Их хэмжээний мөнгөөр тогловол их хэмжээний мөнгө олж болдог гэдгийг мэдээд бооцооны дүнгээ ихэсгэсэн. Эхнэртээ тансаг бэлэг сэлт авч өгч, орлогоо өсгөж чадсандаа машид баярлаж байв. 

Ингээд би өдөрт 30-40 минутыг онлайн тоглоомд зарцуулдаг байснаа хэдэн цагийг зарцуулдаг болж хувирсан. Өдөр шөнөгүй тоглож, компьютероос тоглох боломжгүй үедээ гар утсаараа тоглож байна.  Их хэмжээний бооцоо тавихад их хэмжээний мөнгө хожно гэж бодож байснаас биш ялагдсан тохиолдолд их хэмжээгээр алдана гэдгийг бодсонгүй явж дээ. 

Ингээд би мөрийтэй тоглоомын одгүй нэгэн бол хувирлаа. Бооцоо тавих мөнгөгүй болоход яаралтай үед хэрэглэх гэр бүлийн хадгаламжаа үрж дуусгав. Би ч юу ч үгүй хоосон нэгэн боллоо. Ялагдлуудаасаа болж сэтгэлээр унах болж, уур уцаар ихсэв. Эхнэр маань энэ байдлыг анзаарч надад тоглоомоо болих хэрэгтэйг сануулсан юм. Гэсэн ч түүний үгэнд орох ухаан надад байсангүй.

Хадгаламж, цалин юу ч үгүй болсон бий найзаасаа 30,000  рубль /1,193,000МНТ/ зээлж, эргүүлэн төлөхдөө 40,000 рубль / 1,591,200МНТ/ болгож өгнө хэмээн амлалаа. Би ялагдсан ч дахин 200,000 рубль зээлж үүнийгээ 1,100,000 болгож өсгөж чадсан юм. Өрөө дарах боломж байсан ч дахин тоглох хүсэлдээ дийлдлээ. Би найздаа одоо 160,000 рублийн / 6,364,800МНТ/ өртэй үлдсэн. 

2019 оны гуравдугаар сард би орон сууцаа барьцаалж зээл авсан. 60,000 рубль /2,386,800МНТ/ банкнаас зээлж, хэдэн өдрийн дараа буцааж төлөв. Хэдэн өдрийн дараа дахин 130,000 рубль  /5,171,400МНТ/ зээлж тоглоод хэдхэн минутын дотор алдчихав. 

Энэ үед эхнэр маань бидний анхны хүүхдийг тээж байсан юм. Аав миний хүүг төрсний дараа 50,000 рублийн /1,989,000МНТ/ тусламж үзүүлнэ хэмээн амлаад байсан юм. Би тэр мөнгөө түрүүлээд өгч байгаач хэмээн гуйхад аав татгалзсангүй. Анхны хүүхдэдээ зориулах мөнгөө казинод алдаж орхилоо.

2019 оны хавар банк надад ахин зээл олгохгүй болсон гэдгээ мэдэгдлээ. Ингээд найз нөхөд, танилуудаасаа мөнгө зээлж эхэлсэн юм. Мэдээж мөрийтэй тоглоом тоглохын тулд мөнгө зээлж байна гэж тэдэнд хэлэхгүй. Эхнэр төрөх дөхсөн, шинээр төрөх хүүхдэдээ юм авах хэрэгтэй байна гэхчлэн худал шалтаг тоочиж байлаа. Үүндээ огтхон ч гэмшсэнгүй.

2019 оны тавдугаар сард эхнэрийн тэвчээр барагдаж, мөрийтэй тоглоом тоглохгүй бол надаас сална гэж хэлсэн. Тэр үед бидний хүүхэд 2 сартай болсон байлаа. Би түүнийг аргадаж, битгий салаач гэж гуйсангүй. ''Хүссэнээрээ бол'' хэмээн хэллээ. Эхнэр хүүхдэдээ хаягдсан ч тоглохоо больж чадахгүй л байлаа. 

Үүнээс хоёр сарын дараа казиногоос 400,000 рубль /15,912,000МНТ/ хожлоо. Бүх өрөө дарж, 130,000 рубльтэй /5,171,400МНТ/ үлдэв. Тэр үед мөрийтэй тоглохоо зогсооё гэж бодсон ч чадсангүй. Маргааш нь дахин мөрийтэй тоглож, бүхнээ алдаж, ахиад л өрөнд унасан байлаа. 

Би хувь хүн талаасаа танигдaхааргүй болж өөрчлөгджээ. Жижиг сажиг зүйлд уурлаж, эхнэр хүүхдээсээ ч аз жаргалыг мэдрэхээ больсон байв. Ердөө хоёр сарын дараа 800,000 рублийн өрөнд орсон. Түрийвч дотор 700 рубль байлаа гэхэд 500-аар нь мөрий тавьж чадахаар болсон байв. Хоол хүнс, унааны мөнгөгүй байсан ч надад хамаагүй боллоо. Шөнө унтахад асуудалтай болсон. 

2019 оны наймдугаар сард миний нийт өр 2,7 сая рубль /107,406,000МНТ/ болсон байв. 

Мөрийтэй тоглоомд орсон нь миний амьдралдаа хийсэн хамгийн том алдаа. Эхнэр маань салах өргөдлөө өгч, бид саллаа. 

Хүн төлсөн мөнгөтэйгөө дүйцэхүйц үйлчилгээ, бараа бүтээгдэхүүн авч байвал тэр шударга бизнес.  Харин казино бол шударга бизнес огтоос биш. Мөрийтэй тоглоом нийгмийг бусниулж, эрүүл, энгийн тайван байсан хүмүүсийг уур уцаартай, донтсон, сэтгэцийн өвчтэй нэгэн болгож хувиргадаг. 

Одоо би мөрийтэй тоглоомоос гарсан. Жижигхэн хөлсний байранд ганцаараа амьдардаг. Буцаад маркетингийн чиглэлээр ажиллаж эхэлсэн бөгөөд 3-3,5 жилийн дотор зээлээ төлж барагдуулна гэж бодож байгаа. Би хүүтэйгээ 7 хоногт 2-3 удаа уулздаг. Эхнэр маань намайг үзэн яддаг нь нүдний харцнаас нь илэрхий харагддаг. Би хааяа охидтой болздог ч тэднээс мөрийтэй тоглоомд донтож эхнэртээ хаягдсанаа нуудаггүй болохоор тэд надаас яваандаа дөлдөг. Мөрийтэй тоглоомд донтсон хүмүүст эртхэн өөрийгөө бузар тоглоомоос татаж аваарай гэж зөвлөе. 

Эх сурвалж С.Тэргэл ЗӨВ.МН

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.