Вьетнам улсын 45 ИРГЭН, улсад нэг тэрбум орчим төгрөгийн хохирол учруулжээ

2020 оны 10 сарын 28

Монгол Улсад 306 вьетнам иргэн ажиллаж, амьдарч байгаагаас 206 иргэн нь хөдөлмөр эрхэлдэг. Эдгээр иргэдээс 45 нь зориулалтын бус буюу хөрөнгө оруулагчийн визээр засварын газар ажиллуулж байсныг Гадаадын иргэн харьяатын газраас хийсэн шалгалтаар илрүүлсэн байна. Хөдөлмөр эрхлэх визтэй иргэд сар бүр Монгол Улсад 840 мянган төгрөг, нийгмийн даатгал, эрүүл мэндийн даатгал болон бусад татварыг улсад төлөх хуультай.

Гэвч Вьетнам улсын эдгээр 45 иргэн татвар төлөөгүйгээс улсад нэг тэрбум орчим төгрөгийн хохирол учруулжээ.

ГИХГ-аас эдгээр иргэдийг төлөх ёстой татварыг төлүүлж, хууль ёсны хөдөлмөрийн визээр ажиллаж, амьдрах эсвэл албадан гаргах хуулийн дагуу арга хэмжээгээ авч байгаа гэнэ. Түүнээс гадна ГИХГ-аас Монголд ажиллаж, амьдарч байгаа төлөвлөгөөт болон төлөвлөгөөт бус шалгалтаа тогтмол хийж байгаа бөгөөд шалгалтын хүрээнд хуулийн зөрчил гаргасан иргэдийг албадан гаргаж байгаа юм.

Тухайлбал, 2020 оны эхний найман сарын байдлаар 127 иргэнийг албадан гаргасан бол 48 хүнийг албадаг гаргахаар бэлтгэлээ хангаж байгаа гэнэ. Монгол Улсад амьдарч байгаа гадаадын иргэд визний хугацаа хэтэрсэн, визний ангиллыг өөрчилж хөдөлмөр эрхлэх зэрэг хууль бус үйлдлийг их гаргадаг байна.

Шалгалтаар ямар нэгэн бичиг баримтгүй 2004 оноос хойш бичиг баримтгүй, хууль бусаар ажиллаж, амьдарч байсан Хятадын хоёр иргэнийг, 1996 оноос хойш хууль бусаар, бичиг баримтгүй амьдарч байсан  Югаслав /хуучин/ улсын нэг иргэнийг олж, хуулийн дагуу арга хэмжээ авч байгаа аж.

Монгол Улсад гадаадын 13715 иргэн ажиллаж, амьдарч байна. Үүнээс,

  • ОХУ-ын  980
  • БНСУ-ын 1000
  • Казахстан улсын 77
  • АНУ-ын 1609
  • БНХАУ-ын 5000 орчим
  • Бусад улсын иргэд.

Мөн Монголд оршин суугаа гадаадын иргэд өмнө нь ГИХГ ажиллаж байсан хүмүүстэй холбоо тогтоож, хуулийн бус арга ашиглах, холбоо тогтоохыг оролдох зэрэг зөрчлүүд их гаргадаг тул ГИХГ-аас  дотооддоо хяналт, шалгалт хийж,  нэг мэргэжилтэн гадаадын иргэнд Монголд оршин суух хууль бус зөвлөгөө өгч, бусдаас хахуул авахаар төлөвлөсөн байсныг илрүүлж, үүрэгт ажлаас нь чөлөөлсөн байна.

Эх сурвалж: ГИХГ

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.