Д.Кёкүшюзанбатбаяр, Т.Баясгалан нарын "Мөнгө угаасан, бусдыг залилсан" гэх хэргийг өнөөдөр шүүнэ

УИХ-ын гишүүн асан Д.Кёкүшюзанбатбаяр, МУГЖ Т.Баясгалан нарт холбогдох хэргийн шүүх хурал өнөөдөр /2025.03.13/ Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхэд болно. 

Эрүүгийн цагдаагийн албанаас тэднийг өөрсдийн болон хамаарал бүхий хүмүүсийнхээ нэр дээр байгуулсан хэд хэдэн компаниар дамжуулан, дархан цаазат Богд хан ууланд болон Яармагийн дэнжид их хэмжээний газар авч, зориулалтын дагуу ашиглаагүй, орон сууцны хороолол барьсан, байгаль орчинд нөлөөлөх байдлын нарийвчилсан үнэлгээ хийлгээгүй гэж үзсэн бөгөөд Прокуророос Эрүүгийн хуулийн 17.3-2.2, 18.6-1-т заасан "Мөнгө угаах, залилах" гэмт хэргийн зүйлчлэлээр яллах дүгнэлт үйлдсэн юм.

Эрүүгийн хуулийн 17.3-2.2-т

-Бусдад ноцтой, эсхүл их хэмжээний хохирол учруулж үйлдсэн бол арван мянган нэгжээс дөчин мянган нэгжтэй тэнцэх хэмжээний төгрөгөөр торгох, эсхүл хоёр жилээс найман жил хүртэл хугацаагаар хорих ял шийтгэнэ, 16.8-1-т 

-Гэмт хэргийн улмаас олсон хөрөнгө, мөнгө, орлого гэдгийг мэдсээр байж түүнийг авсан, эзэмшсэн, ашигласан; түүний хууль бус эх үүсвэрийг нь нуун далдлах, гэмт хэрэг үйлдэхэд оролцсон аливаа этгээдэд хуулийн хариуцлагаас зайлсхийхэд туслах зорилгоор өөрчилсөн, шилжүүлсэн; түүний бодит шинж чанар, эх үүсвэр, байршил, захиран зарцуулах арга, эзэмшигч, эд хөрөнгийн эрхийг нуун далдалсан бол зургаан сараас нэг жил хүртэл хугацаагаар зорчих эрхийг хязгаарлах, эсхүл зургаан сараас нэг жил хүртэл хугацаагаар хорих ял шийтгэнэ гэж заажээ. 

Энэхүү хэргийг 2023 онд Нийслэлийн Хан-УУл дүүргийн шүүхэд хэлэлцээд шүүгчдэгчдийг гэм буруугүй гэж үзсэн ч Нийслэлийн Прокурорын газрын гомдлоор дахин анхан шатны шүүхээр хэлэлцэхээр болсон юм.