С.Амарсайхан: Ж.Эпштейнийн хэрэгт Монголын улстөрчид холбогдсон эсэх асуудлаар ажлын хэсэг байгуулж, эргэлзээг тайлна

Өчигдөр буюу тавдугаар сарын зургааны өдөр Хууль зүйн байнгын хорооны хурлын үеэр Ж.Эпштейний хэргийн файлд Монголын улстөрчдийн нэр дурдагдсан талаар яригдсан. Мөн энэ асуудлаар сонсгол зохион байгуулна хэмээн УИХ-ын гишүүн Б.Баярбаатар мэдэгдээд буй. 

Энэ талаар ХЗДХ-ийн сайд С.Амарсайханаас тодрууллаа. 

Тэрбээр " Ж.Эпштейны хэрэгт Монголын улстөрчдийн нэр дурдагдаад нийгэмд талцал хуваагдал, сэтгэл зүйд сөргөөр нөлөөлөх, улс орны нэр хүндийн асуудал яригдахаар мэдээллүүд гарч байна.  Иймд улс орны ирээдүй, нийгмийн аюулгүй байдлын үүднээс ажлын хэсэг байгуулж, мухарлаж, эргэлзээг тайлна.  

Ажлын хэсэг дан ганц  Ж.Эпштейнийн хэрэг бус хар тамхи, цахим залилан, хүний наймаа зэрэг асуудлыг цогцоор авч үзнэ.

Хууль шүүхийн байгууллагаар нотлогдоогүй зүйл дээр улстөржиж, хэн нэгнийг гүтгэж болохгүй гэдгийг би сайд болсноосоо хойш илэрхийлсээр байгаа. 

Нэгэнт байнгын хорооны хурал дээр яригдсан дотоод аюулгүй байдалтай  холбоотой ийм асуудал дээр  бодлогын яам, холбогдох байгууллагууд чимээгүй байж болохгүй. 

Улсынхаа хууль тогтоомжийн хүрээнд үнэн бодитой эсэхийг тогтоох нь зүйтэй. Сонсгол зохион байгуулах нь УИХ-ын гишүүний бүрэн эрхийн асуудал" гэв.