Засгийн газрын үйл ажиллагааны мөрийн хөтөлбөрт насны тэтгэвэр тэтгэмжийг ахмад настнуудад олгоно гэж тусгасны дагуу 65 ба түүнээс дээш настай ахмад настнуудад Цагаан сар болон Үндэсний их баяр наадмын өмнө буюу жилд хоёр удаа насны хишиг олгохоор хуульд тусгасан.
Үүний дагуу энэ оны нэгдүгээр сарын 24-ны өдрийн Засгийн газрын хуралдаанаар Насны хишиг олгох журам батлагдсан бол өнгөрсөн долоо хоногт хуралдсан УИХ-ын нэгдсэн чуулганаар Ахмад настны тухай хуулийн шинэчилсэн найруулгын төсөл батлагдсан юм.
Журамд зааснаар “Насны хишиг” авах ахмадуудын насыг 4 ангилж тусгасан. Тодруулбал,
65-69 настай ахмад настан 50 мянга,
70-79 настай ахмад настан 80 мянга,
80-89 настай ахмад настан 150 мянга,
90 ба түүнээс дээш настай ахмад настан 250 мянган төгрөг олгох юм.
Ахмадууд ямар бичиг баримт бүрдүүлэх вэ?
Насны хишиг олгох журмын хавсралтаар баталсан тусгай өргөдөлийн маягтыг харьяа дүүрэг, хорооныхоо нийгмийн, халамжийн асуудал хариуцсан мэргэжилтнээс авч бөглөнө. Ингэхдээ заавал иргэний үнэмлэхтэй очих юм байна. Хэрэв хэвтэрт байгаа болон бусад шалтгаанаар өөрийн биеэр ирж чадахгүй тохиолдолд итгэмжилсэн төлөөлөгчөөр дамжуулан өргөдлийн маягт бөглөж, гарын үсэг зурж, он сар өдрийг тэмдэглүүлснээр "Насны хишиг"-т хамрагдах боломжтой.
Итгэмжлэгдсэн төлөөлөгчийн хувьд өөрийнхөө иргэний үнэмлэх, нэг хувь хуулбарын хамт маягт бөглөж өгөх ёстой юм байна.
Харин хорих ангид ял эдэлж байгаа ахмадуудын хувьд мөнгө нь дансанд байршина. Хэрэв авахыг хүссэн тохиолдолд ар гэрийнхнийхээ хэн нэгэн итгэмжлэгдсэн төлөөлөгчөөр дамжуулан авах боломжтой.
Иргэний үнэмлэхний хуулбар, өргөдлийн маягттай хавсаргасан материалыг сум, хорооны нийгмийн ажилтан аймаг, дүүргийнхээ халамж үйлчилгээний байгууллагуудад хүргүүлснээр тухайн байгууллагын мэдээллийн санд “Насны хишиг” авах эрхтэй ахмадуудын бүртгэл бий болно. Бүртгэлийг Нийгмийн хамгаалал, хөдөлмөрийн яамны харьяа Нийгмийн халамж үйлчилгээний ерөнхий газарт нэгтгэнэ.
Ахмадууд насны хишгийг ямар банкуудаар дамжуулан авах вэ?
ХААН банк, Төрийн банк, Капитал банкаар дамжуулан ямар нэгэн зээлийн хүү, үлдэгдэл зэрэгт төлбөр, хураамж авахгүйгээр олгоно. Хэрэв хүсвэл "Насны хишиг" авах тусгай данс нээлгэж болох бөгөөд банкууд насны хишиг олгох дансыг үнэ төлбөргүй нээж өгөх аж. Харин өөрийн эзэмшиж байгаа дансаар мөнгө авах бол тухайн банкинд хандан дансаа бүртгүүлж мөнгөө авах боломжтой.
"Насны хишиг"-ийг хэзээ олгож эхлэх вэ?
Цагаан сараас өмнө Насны хишиг авах хүсэлтээ гаргасан ахмадууд хоёрдугаар сарын 15-ны дотор мөнгөө авах боломжтой юм байна. Өргөдлийг маргаашнаас эхлэн /2017.02.01/ авах бөгөөд ирэх зургадугаар сарын 30-ны өдөр хүртэл бүртгэл үргэлжилнэ. Үүнээс хойшхи хугацаанд өргөдлөө өгсөн бол 2018 онд насны хишигээ авах юм байна.
ахмадууд материалаа эрт бүрдүүлэх тусам мөнгөө эрт авах боломж үүсэх аж.
Б.Сондор
Сэтгэгдэл бичигдээгүй байна