Багшийн цалинг 1000 ам.доллар хүргэхгүй бол ажил хаялт зарлана

Багш нарын цалинг 1000 ам.долларт хүргэхгүй бол ажил хаялт зарлах талаараа нийслэлийн багш нар мэдээлэл хийлээ. 

 "Бидний зүгээс есдүгээр сарын  11-нд салбарын хэлэлцээр эхлүүлэх тухай мэдэгдлийг Боловсрол, шинжлэх ухааны сайдад хүргүүлсэн. Мэдэгдлийн хугацаа аравдугаар сарын 3-нд дуусна. Хэрвээ энэ хугацаанд хариу өгөхгүй бол Дэлхийн багш нарын эрхийг хамгаалах өдөр буюу аравдугаар сарын 5-нд ажил хаяхаар төлөвлөөд байна.

Боловсролын салбарын ачааны хүндийг үүрч явдаг манаач, тогооч нарын сарын цалин 750 мянган төгрөг. Энэ 750 мянгаар хүн шиг амьдрах ямар ч боломжгүй. Өрнөөс өрний хооронд амьдарч байна. Сургуульд жижүүр харуул олдохоо больсон.

Бүх багш нар гадаад явж хар ажил хийгээд Монголд ажиллах багш олдохгүй байна. Тиймээс гадаад шиг биш юмаа гэхэд 1000 ам.доллар хүргэх хэрэгтэй байна.

Багшийн цалин хуримтлал үүсгэх хэмжээний биш амь зогоох л төдий.  Багш нарыг дорд ортол нь амьдруулснаас болж, тэмцэл хийхэд хүрч байна. Үндсэн цалингаа нэм, тэрний, энэний нэмэгдэл гэдэг зүйлээр аргацаах зүйл байхгүй.

Багшийн сургуульд үнэ төлбөргүй сургаад тэд багш хийхгүй. Яагаад гээч авдаг цалин нь бага байгаа учраас. Тэнд 4 жил сургаж, агаарт мөнгө цацахын оронд багш нарын цалинг нэмэгдүүлэх юм бол хамгийн сайн хүүхдүүд шуураад л ороод ирнэ. Багшийн үндсэн цалинг нэм" гэв.