О.Одбаяр: Угаараас болоод дөрвөн дүү минь ээжтэй минь хамт намайг орхиод явчихлаа

БГД-ийн 22-р хороонд 1 дүгээр сарын 23-24-нийг шилжих шөнө нэг гэр бүлийн зургаан хүн угаартсаны улмаас нас барсан хэрэг гарсан.

Уг хэрэгтэй холбогдуулан гэр бүлээсээ ганцаар үлдсэн 17 настай хүү цэргээс чөлөөгөөр ирж мэдээлэл өглөө. 

"Цэргээс чөлөө өгөөд би хотод ирсэн. Шахмал түлшнээс болоод ээж дүү нараа алдчихлаа. Надад их хэцүү байна. Гомдолтой байна. Хаана хандахаа үнэхээр мэдэхгүй байна. 

Ээжтэй хамгийн сүүлд найман сард уулзсан. 12 сарын 18-нд утсаар ярьсан. Тэр үед ээж "Бид нар сайн байгаа. Миний хүү ирээд эхнэр хүүхэд авах боллоо доо" гээл ярьж байсан. Миний жоохон дүү нар юу ч мэдэхгүй байж байгаад өнгөрчихлөө. 

Цэргээс чөлөө өгөөд гэртээ ирээд л юу болсныг мэдсэн. Ах маань гэр рүүгээ тайван ороорой. Сэтгэлээ бариарай гэж хэлсэн. Ээж дүү нар чинь угаараас болоод бурхан болчихлоо гээд хэлэхэд л би ухаан мэдрэлгүй болчихсон. 

Тухайн үед ээж гурван дүү маань мөн хамаатны ах маань хүүхэдтэйгээ байсан гэсэн. 

Улсаас ээж дүү нарын маань оршуулгын зардалд 5 сая төгрөг өгсөн байсан. Одоо миний амьдрал маш бүрхэг болчихлоо. Томчууд нь намайг сонсож байвал миний асуудлыг шийдэж өгөөрэй. Би маш их гомдолтой байна. Бид аавгүй өссөн. Ээж минь биднийг хүний дайтай сайн өсгөх гэж үйлчлэгч хийж хичээж ирсэн. Ард иргэд нь ийм дорой амьдралаар амьдраад үхээд дуусах юм уу. Амьдрах хүсэл зорилго бөхөж байна. 

Би гэрийнхнийхээ төлөө чадах бүхнээ хийнэ" гэлээ.