Дорноговь аймгийн Шуурхай штаб, Аймгийн Онцгой комисс, Сайншанд сумын Онцгой комисс хуралдлаа. Хуралдааны тухай өчигдөр /2021.03.07-ны 10.30 цагт/ мэдээлэл өглөө.
ЭРҮҮЛ МЭНДИЙН ГАЗРЫН ДАРГА Г.ЭНХЦЭЦЭГ:
Гуравдугаар сарын 06-ны өдөр Төв аймагт халдварын тохиолдол бүртгэгдсэн. Төв аймагт айлын ажил явдалд Улаанбаатар болон Төв аймгийн сумдаас 200 орчим хүмүүс цугларснаас 4 хүн халдвар авсан нь батлагдлаа. Халдвар авсан хүмүүсийн ойрын хавтал бүхий нэг хүн Дорноговь аймагт ажил хэргээр ирсэн нь тогтоогдож Аймгийн Онцгой комисс, Сайншанд сумын Онцгой комисс хуралдан шуурхай арга хэмжээ авч ажиллаа. Төв аймагт илэрсэн тохиолдлын ойрын хавьтал бүхий нэг хүн, хамт явсан нэг хүнийг тусгаарлаж, түргэвчилсэн болон PCR шинжилгээ авсан. Шинжилгээний хариу сөрөг гарсан. Одоогийн /2021.03.07-ны 11.00 цаг/ байдлаар халдвар илрээгүй байна.
САЙНШАНД СУМЫН ЗАСАГ ДАРГА Ч.ТҮВШИНТӨР:
Сайншанд хотод халдварын сэжигтэй тохиолдол илэрсэнтэй холбогдуулан Сайншанд сумын Онцгой комисс хуралдаж 2021.03.07-ны 06.00 цагаас эхлэн Хамарын хийд, Ханбаянзүрх уулын чиглэлд зорчих иргэдийн хөдөлгөөнийг тодорхойгүй хугацаагаар хязгаарлалаа. Улаанбаатар болон бусад аймаг, орон нутгаас Хамарын хийд, Ханбаянзүрх уулын чиглэлд аялах, зорчих боломжгүй болсныг анхааруулж байна. Амралтын өдрүүдээр Олон улсын эмэгтэйчүүдийн эрхийг хамгаалах өдөр тохиож байгаа учраас иргэд бөөгнөрөл үүсгэхгүй байх, зөвхөн гэр бүлийн хүрээнд тэмдэглэж халдвар хамгааллын дэглэмээ баримтлан сонор сэрэмжтэй байхыг анхааруулж байна.
Эх сурвалж: Дорноговь аймгийн Засаг даргын Тамгын газар
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна