СУРВАЛЖИЛГА: Зургаан сартай хүү эрүүл бойжиж байгаа ч эхийгээ үгүйлж бэтгэрч байна

Бага насны хүүхдээ орхиж, сураггүй болсон У гэх эмэгтэйг цагдаагийн байгууллагаас эрэн сурвалжилж байна. 

Одоогоос зургаан сарын өмнө аав, ээжийнхээ аз жаргал, гэрэл гэгээ нь болохоор энэ хорвоод эрүүл саруул хүү Монгол Улсын иргэн болж, мэндэлж байлаа. Гэвч тэр бяцхан зүрхний төсөөлж ч байгаагүй хатуу хувь тавилан түүнийг угтаж, дөнгөж дөрөвхөн сартай хорвоотой танилцаж эхлэхдээ л түрээсийн байранд төрсөн ээждээ хаягдаж, элэг эмтлэм гашуун амьдралыг үзэж байна.

Үүнээс хойш бүтэн хоёр сар өнгөрсөн ч хүүхдийн ээж эргэж ирсэнгүй. Хүү сайхан сэтгэлт хүмүүсийн ачаар эрүүл саруул бойжиж буй ч хөхнөөсөө салаагүй нялх хүү эхийгээ санаж, бэтгэрч байна. 

Та бүхэн санаж байгаа бол дөнгөж төрсөн нярайгаа асрагч авч, хуурч үлдээгээд сураггүй болсон талаарх мэдээлэл цагдаагийн байгууллагад бүртгэгдэж, олон нийтийг сэрдхийлгэж байсан юм.

Тодруулбал, Т хүүгийн ээж У гэх эмэгтэй өнгөрсөн тавдугаар сарын 24-нд Гурван гал эмнэлэгт амаржсан ч тухайн эмнэлэгт төлбөрөө төлөлгүй зугтаж, түрээсийн байранд амьдарч байхдаа асрагч авна хэмээн зар тавьж, зарын дагуу ирсэн эмэгтэйд хүүхдээ үлдээгээд мөнгө олж ирнэ гэж хэлээд сураггүй болжээ.

Эх сурвалжийн мэдээлж буйгаар У гэх эмэгтэй нь өмнө нь залилангийн хэрэгт холбогдож байсан, архины хамааралгүй гэх мэдээлэл байгаа юм. Цагдаагийн байгууллагад уг мэдээлэл бүртгэгдсэнээс хойш тухайн эмэгтэйг Баянгол дүүргийн хэмжээнд эрэн сурвалжилж байсан бол эрэл мухардалд орж, одоогийн байдлаар Монгол Улсын хэмжээнд эрэн сурвалжилж байна.

Хүүг асрамжийн газарт өгөхөөр хөөцөлдсөн ч манай улсад хүүхдийн асрамжийн газар хомсдолтой байгаа тул ор олдохгүй байгаа. Мөн сайхан сэтгэлт иргэд өргөж авъя гээд ирж байгаа ч ээжийг нь асран хамгаалах эрхээс нь түдгэлзүүлээгүй учир өргүүлэх боломжгүй. Одоогийн байдлаар ээжийг нь олох л хамгийн чухал асуудал болоод байгаа талаар Баянгол дүүргийн Хүүхэд хамгааллын хэлтсийн дарга Б.Даваажаргал учирлан ярьж байлаа.

Тэрбээр "Хоёр сарын өмнө цагдаагийн байгууллагаас манай байгууллагад дөрвөн сартай нярайг хүлээлгэж өгсөн. Анх ирэхдээ жингийн дутагдалтай, их уйлагнадаг байсан ч асрагчид цагаар сүүг нь өгч одоо эрүүл саруул байгаа. Гэхдээ л хүүхэд аав, ээжтэйгээ л байхдаа хамгийн жаргалтай байдаг тул аль болох ээжийг нь эрж, олмоор байна. 

Хууль дүрэмтэй улс тул асран хамгаалагчтай нь уулзаж, нөхцөл байдлыг тогтоож, эх байх эрхийг нь хасах эсэхийг шийднэ. Үүний дараа хүүхдийг хаана үлдээх талаар хэлэлцэж эхэлнэ. 

Залуучууд маань гэр бүлийн төлөвлөлтийн талаар ойлголттой болж, хариуцлага гэдэг зүйлийг ухамсарламаар байна" гэв. 

Хөхөө шувуу л үрээ бусдын үүрэнд орхидог шиг тээж, төрүүлсэн үрээ танихгүй хүнд хаяад явсан ээж бусдад сургамж болно гэж найдаж байна.

Сүүлийн үед зарим залуус гэр бүл төлөвлөлтгүйн улмаас бие биенээ таньж мэдэлгүй үр хүүхэдтэй болж, эцэстээ хариуцлагаас зугтаж, хүүхдийн эрхийг ноцтойгоор зөрчдөг асуудал нийгэмд түгээмэл болсон нь харамсалтай. 

Энэ жилийн хугацаанд зөвхөн Баянгол дүүрэгт л гэхэд үр хүүхдээ хаяж явсан тохиолдол гурав бүртгэгдсэн байна. 

Бид үр хүүхдүүдээ багаас нь гэр бүл төлөвлөлтийн талаар ойлголт өгч, эцэг эхийн хариуцлага гэдэг зүйлийг хуулийн дагуу чанга болгох цаг нь болсон гэдгийг энэхүү сэтгэл эмзэглүүлэм кейс харуулж байна.