Асашёорюү Д.Дагвадорж: Миний хүсэл биеллээ

Шинэ оны босгон дээр Монголчуудын магнайг тэнийлгэсэн нэгэн гайхалтай үйл явдал болсон билээ. Мэргэжлийн сумо бөхийн 68 дахь их аварга, Гавьяат тамирчин, Хөдөлмөрийн баатар Асашёорюү Д.Дагвадорж Японы Abema телевизийн “Асашёорюүг унагаагаад 10 сая иен” шоу нэвтрүүлэг оролцон найм барилдахдаа нэг ч уналгүйгээр түрүүлсэн юм. Сумогоос хэсэгтээ тасарсан Монголчууд уг нэвтрүүлгийг үзээд их аваргаагаа бахархан омогшиж, шинэ жилээ хувьтай сайхан угтаж авч чадсан нь сошиал хэрэглэгчдийн сэтгэгдлээс анзаарагдаж байлаа.



Тэрбээр нэвтрүүлгийн дараа өөрийн сэтгэгдлээ ийн хуваалцжээ: 

"Ирж байгаа 2018 онд Төрийн түшээд минь эх орноо бодсон, ард түмнээ гэсэн сэтгэл нь нэгдсэн хөгжлийн төлөө зүтгэх жил болоосой гэж хүсэж байна. Би нэг зүйлийг тайлбарлаж хэлэхгүй бол болохгүй байсан. Тэртээ найман жилийн өмнө гэнэтийн зодог тайлж байсан ч дахин барилдах юмсан гэж бодогддог юм байна. Өнгөрсөн долоон жилийн хугацаанд барилдааны тухай олон удаа бодож, нойрон дундаа хүртэл сүмогоо зүүдэлж байсан Асашёорюү миний биеийн хүсэл биелж, оны өмнөхөн сүмогийн төдийгүй бусад спортын төрлийн бөхчүүдтэй барилдлаа. Би сэтгэлд уяатай явсан бодлоо биелүүллээ. Одоо надаас сүмогийн ялалтын бурхан холдсон гэж бодож байна. Цаашдаа хоёр улсын хооронд Ерөнхийлөгчийн бие төлөөлөгчийн ажлыг сайн хийж, эх орон руугаа хөгжлийг авчрах эх үүсвэрт хоёргүй сэтгэлээр зүтгэнэ гэж та бүхэндээ шинэ оны босгон дээр хэлмээр санагдаж байна. Асашёорюүгийн биеэс ялалтын бурхан буцсан байх. Сэтгэл үнэхээр сайхан байлаа. Энэ нэвтрүүлэгт оролцохынхоо өмнө Н.Цэвэгням ахын дэвжээнд очиж бэлтгэл хийхэд үүлэн дээр хөвж байгаа мэт тийм сайхан мэдрэмж төрж байсан. Олон жилийн өмнө энэ сайхан мэдрэмжийг мэдэрч байсан даа гэж бодогдтол дурсамж үлдээсэн сүмогийн тэмцлийг өнөөдөр гаргаж чадлаа. Гэхдээ өмнөх шигээ тийм сайн хүчтэй байгаагүй нь илт байсан ч найман бөхийг дараалан давлаа. Мөн сүмо бөхийн тэмцэл, бас Асашёорюү аварга гэж хэн бэ гэдгийг харуулж өгсөн болов уу. Хэлэхэд амар, хийхэд хэцүү гэдэг үг байдаг. Түүнтэй адил барилдана гэдэг хэцүү асуудал. Сүмогийн бурхан дэвжээндээ буцаж, энэ олон янзын асуудлыг цэгцлээд өгөх болов уу гэж бодож байна. Нийт монголчууд та бүхэндээ аав, ээж, хань, үр хүүхэд, ахан дүүсийнхээ өмнөөс шинэ жилийн мэнд хүргэе. Улс оронд минь илүү их хөгжил, илүү их эв нэгдэл, илүү их хүсэл зорилго нэгдсэн жил болоосой гэж хүсэж байна. Шинэ жилийн баярын өдрөөр та бүхэнтэйгээ нэгэн нэвтрүүлэгээр уулзаж, эрч хүч бэлэглэсэн байх гэж итгэж байна." гэв.