Харвардын их сургуулийн тренд болж буй үнэгүй суралцах боломжтой 10 ЦАХИМ СУРГАЛТ

Цар тахалтай холбоотойгоор хөл хорио тогтоож, хүн бүрийг гэртээ байхыг уриалж байна. Энэ цаг үеийг та өөртөө зорилго тавьж, олон зүйлийг оролдож үзэн шинэ зүйл сурахад зарцуулаарай.  Цар тахлаас үүдэлтэйгээр гэртээ байгаадаа гуних бус байгаа цаг хугацаагаа ашиглан өөртөө шинэ боломжийг нээх нь хамгийн зөв сонголт юм.

Ингээд та бүхэнд дэлхийн топ сургуулиудын нэг болох Харвардын их сургуулийн цахим сургалтууд дунд тренд болж буй 10 сургалтыг танилцуулъя. Танд интернеттэй орчин байхад л хангалттай. Дэлхийн алдарт их сургуулийн хөтөлбөрийг үнэгүй суралцах боломж таны өмнө нээлттэй байна. Харин та сургалтад хамрагдсаныхаа дараа батламж авахыг хүсвэл 69-199 ам.доллар төлөх юм.

Анагаах ухаан, архитектур, улс төр, санхүү, хууль, хувь хүний манлайлал зэрэг сэдвүүд таны анхаарлыг татна гэдэгт итгэлтэй байна. Доорх сургалтуудаас өөрт тохирсныг сонгон суралцаж, оюундаа хөрөнгө оруулаарай.

КОМПЬЮТЕРЫН ШИНЖЛЭХ УХААН: ТОГЛООМ ХӨГЖҮҮЛЭЛТ

Уг цахим сургалтад хамрагдсанаар:

• Super Mario Bros.,
• Pokémon,
• Angry Birds гэх зэрэг алдартай тоглоомуудын загвар дизайнтай танилцах ба 2D, 3D, интерактив тоглоомуудын хөгжлийн талаар суралцах боломжтой.

Лекц болон практик ажиллагаагаар дамжуулан 2, 3 хэмжээст график, анимэйшнийг программын хэл ашиглан бүтээнэ. Сургалтын төгсгөлд та өөрийн хүссэн хэд хэдэн тоглоомыг програмчилж, тоглоомын дизайн, хөгжүүлэлтийн үндсийн талаар мэдлэгтэй болох юм.

Үргэлжлэх хугацаа: 12 долоо хоног,  долоо хоногт 6-9 цаг

ЭНД дарж сургалтад хамрагдах албан ёсны сайтад зочлоорой.

НЯГТЛАН БОДОХ БҮРТГЭЛ БА САНХҮҮГИЙН ТАЙЛАН

Ашгийн бус байгууллагын нягтлан бодох бүртгэл ба санхүүгийн тайлангийн танилцуулгын цуврал сургалтыг санхүүгийн талаар туршлагагүй, анхлан суралцагч нарт зориулсан.

Уг сургалтаас та ашгийн төлөө бус байгууллагын нягтлан бодох бүртгэлийн үндсэн ойлголт, санхүүгийн тайлангийн талаарх энгийн мэдлэгийг олж авна. Мөн эрсдэлийн менежментийн талаарх мэдээлэл ч сургалтын агуулгад багтжээ.

Энэхүү бие дааж суралцах боломжтой вэб семинарт “PricewaterhouseCoopers National Assurance Health Services”-ийн Гүйцэтгэх захирал Эрик Шварц багшилдаг аж.

ЭНД дарж сургалтад хамрагдах албан ёсны сайтад зочлоорой.

ХУУЛЬЧДАД ЗОРИУЛСАН КОМПЬЮТЕРЫН ШИНЖЛЭХ УХААНЫ ХӨТӨЛБӨР

Энэхүү хөтөлбөрийг хуульчид болон хуулийн чиглэлээр суралцаж буй оюутнуудад хүртээмжтэй байхаар боловсруулжээ.

Технологийн зааварчилгаа, кейс судлалын хэлэлцүүлгээр дамжуулан оюутнууд энэ талын зохих ойлголттой болно. Үүнээс гадна технологийг ашиглан хууль зүйн үндэслэл, тайлбарыг боловсруулахад чухал ач холбогдолтой.

Алгоритм, үүлэн тооцоолол, мэдээллийн сан, сүлжээ, нууцлал аюулгүй байдлыг хангах, програмчлал зэрэг сэдвүүдийн хүрээнд сургалт өрнөнө.

Үргэлжлэх хугацаа: 10 долоо хоног, долоо хоногт 3-6 цаг

ЭНД дарж сургалтад хамрагдах албан ёсны сайтад зочлоорой.

НИЙТИЙН ЭРҮҮЛ МЭНДИЙН АЖИЛТАН

Хэдийгээр анагаах ухаан, технологи өндөр хөгжиж байгаа хэдий ч дэлхийн хүн амын тал нь зайлшгүй шаардлагатай эрүүл мэндийн тусламж үйлчилгээг авч чаддаггүй. Үүнээс улбаалаад жил бүр 8.9 сая гаруй хүн урьдчилан сэргийлэх боломжтой өвчний улмаас амиа алддаг.

Дэлхий даяар эрүүл мэндийн салбарын ажилтнуудын тоо хангалттай бус байна. 2030 он гэхэд 18 сая эрүүл мэндийн ажилтны орон тоо сул байна хэмээх судалгаа гарчээ.

Тиймээс эрүүл мэндийн ажилтнуудын тоог нэмэгдүүлж, сургах нь жил бүр олон сая хүний амийг аврах шийдэл хэмээн үзжээ. Та уг сургалтаас нийгмийн эрүүл мэндийн үндсэн ойлголтуудыг мэдэж авна.

ЭНД дарж сургалтад хамрагдах албан ёсны сайтад зочлоорой.

ХҮҮХЭД ХАМГААЛАЛ БА ХҮҮХДИЙН ЭРХ

Дэлхий даяар олон сая хүүхэд хүчирхийлэл, мөлжлөгийн золиос болж биедээ ахадсан амьдралыг нуруундаа үүрч яваа. Хүний наймаа, хүүхдийн хөдөлмөр эрхлэлт, хүсээгүй гэрлэлт гэх мэт олон асуудал нийгэмд бий.

Харвардын “FXB” Эрүүл мэнд, хүний эрхийн төвийн судалгааны захирал Жаклин Бхабхагаар удирдуулсан энэхүү сургалт нь хүүхэд хамгааллын салбар дахь алдаа дутагдал бөгөөд, сайжруулах талуудын тухай заах болно.

Та бүхэн хүүхдийг хамгаалахад шаардагдах стратеги, олон улсын хууль тогтоомж, стандарт, шаардлагатай эх сурвалжуудын тухай өргөн ойлголтыг мэдэх боломжтой.

Үргэлжлэх хугацаа: 16 долоо хоног, долоо хоногт 2-5 цаг

ЭНД дарж сургалтад хамрагдах албан ёсны сайтад зочлоорой.

МАНЛАЙЛЛЫГ ХЭРЭГЖҮҮЛЭХ СУУРЬ ЗАРЧИМ

Бидний амьдарч буй цаг үед гэр бүл, хамт олон, албан байгууллага болоод нийгэмтэйгээ дасан зохицох ёстой олон асуудлууд тулгардаг. Тиймээс эдгээр асуудалтай зоригтой нүүр тулахад бусдыг уриалж, чиглүүлэхийн тулд манлайлал чухал үүрэг гүйцэтгэнэ.

Та бүхэн уг сургалтад хамрагдсанаар өөрийн буй орчиндоо өөрчлөлтийг авчрах, манлайлах стратегийг мэдэж авна. Хамгийн чухал нь манлайлагчдад тулгардаг сорилтуудыг хэрхэн давах арга барил олж авах юм.

Үргэлжлэх хугацаа: 4 долоо хоног, долоо хоногт 2-3 цаг

ЭНД дарж сургалтад хамрагдах албан ёсны сайтад зочлоорой.

АНУ-ЫН НИЙГЭМ, ЭДИЙН ЗАСАГ БА ТӨРИЙН БОДЛОГО ГАДААД БОДЛОГО

Уг сургалтад хамрагдсанаар АНУ-ын төрийн бодлого, улс төрийн динамикийн талаар суралцах боломжтой. Түүнчлэн:

• Тус улсын эдийн засгийг хүчирхэг болгосон хүчин зүйлүүд
• Шашин шүтлэг, улс төр хэрхэн зөрчилдөөний эх үүсвэр болж ирсэн түүх
• АНУ-ын төсвийн болон мөнгөний бодлогын чанар
• Шашин шүтлэг, улс төр хэрхэн байнгын зөрчилдөөний эх үүсвэр болж ирсэн
• АНУ-ын төсвийн бодлого ба мөнгөний бодлогын мөн чанар
• Нийгмийн халамжийн бодлого нь өрнөдийн бусад ардчиллынхаас хэрхэн ялгаатай вэ?
• Татварын системийн бүтэц зэрэг сэдвийн хүрээнд мэдлэг хуримтлуулах давуу талтай.

Үргэлжлэх хугацаа: 4 долоо хоног, 2-4 цаг

ЭНД дарж сургалтад хамрагдах албан ёсны сайтад зочлоорой.

УУР АМЬСГАЛЫН ӨӨРЧЛӨЛТИЙН ЭРҮҮЛ МЭНДЭД ҮЗҮҮЛЭХ НӨЛӨӨ

Дэлхийн дулаарал бол хүн төрөлхтний өмнө тулгараад буй томоохон асуудлын нэг билээ.

Уг сургалтыг Харвардын их сургууль Дэлхийн Эрүүл Мэндийн Хүрээлэнгийн дэмжлэгтэйгээр бүтээжээ. Та бүхэн уг сургалтаас цаг уурын өөрчлөлт дэлхийн өнцөг булан бүрд байгаа хүмүүст хэрхэн нөлөөлж байгааг олж мэдэхээс гадна энэ нь таны амьдралд хэрхэн шууд нөлөөлж байгааг онол дээр тулгуурлан ойлгох боломжтой.

Дэлхийн дулаарлаас үүдэлтэй асуудлуудын эрсдэлийг бууруулахын тулд хүн бүрийн оролцоо чухал юм.

Үргэлжлэх хугацаа: 7 хоног, 3-5 цаг

ЭНД дарж сургалтад хамрагдах албан ёсны сайтад зочлоорой.

МӨНГӨ, ЗАХ ЗЭЭЛ БА ЁС СУРТАХУУН

Бидний нийгэм дэх мөнгөний зах зээлийн үндсэн ач холбогдол юу вэ. Хорвоо дээр мөнгөөр худалдаж авах боломжгүй зүйл бий юу. Хүмүүс гэр бүл, хүүхэд, иргэншил эсвэл их сургуулийн дипломыг мөнгөөр худалдаж авч болох уу. Та бүхэн дотроо өөрсдийн гэсэн дүгнэлт хийж буй байх. Тэгвэл та бүхэн чадварлаг профессор Майкл Ж.Санделийн удирдан явуулдаг уг сургалтад хамрагдсанаар хууль тогтоомж нь зах зээлд ёс суртахууны хязгаарлалт тогтоох ёстойг авч үзэх болно.

Түүнчлэн философи, орчин үеийн ёс суртахуун, улс төрийн маргаан дээр үндэслэн бид ямар бараа, нийгмийн практик үйл ажиллагаа борлуулагдах ёсгүйг тодорхойлох болно.

Үргэлжлэх хугацаа: 8 долоо хоног, долоо хоногт 2-4 цаг

ЭНД дарж сургалтад хамрагдах албан ёсны сайтад зочлоорой.

АРХИТЕКТУРЫН ТӨСӨӨЛӨЛ

Түүхэнд үнэ цэнээ үлдээсэн чухал барилгуудыг судлах замаар архитектурын үндсэн зарчмуудыг сураарай.

Та бүхэн уг сургалтад хамрагдсанаар:

• Олон янзын архитектурын дүрслэлийг хэрхэн таних, шинжлэх, ойлгох
• Архитектурын томоохон бүтээлүүдийн ард өгүүлэгдэх нийгэм ба түүхэн нөхцөл байдлын агуулгыг ойлгох
• Архитектурын зураг, загварыг гаргах үндсэн зарчим
• Эрдэм шинжилгээний ажилд зориулсан архитекторын мэргэжлийн агуулгын талаарх ойлголттой болно.

Үргэлжлэх хугацаа: 10 долоо хоног, долоо хоногт 3-5 цаг

ЭНД дарж сургалтад хамрагдах албан ёсны сайтад зочлоорой.

Эх сурвалж: Gogo.mn