БАРИМТ: А.Адъяасүрэнг 100.000 долларын авлигын хэрэгт яллагдагчаар татсаныг хүчингүй болгожээ

УИХ-ын гишүүн А.Адъяасүрэн нь нүүрс тээврийн С зөвшөөрөл авахын тулд Авто тээврийн газрын нэр бүхий албан тушаалтанд 100 мянган ам долларын авлига өгсөн хэргээр АТГ-т шалгагдаж, яллагдагчаар татагдсан талаар бид өмнө нь мэдээлж байсан билээ.

Тэрбээр УИХ-ын гишүүний халдашгүй эрх гэсэн “хамгаалалттай”-гаар хуулийн байгууллагад шалгагдаж байсан юм.

УИХ-ын гишүүн А.Адъяасүрэн нь нүүрс тээврийн С зөвшөөрөл авахын тулд Авто тээврийн газрын нэр бүхий албан тушаалтанд 100 мянган ам долларын авлига өгсөн хэрэгт шалгагдаж, Нийслэлийн прокурорын газарт хэргийг нь хянаж байв. 

Энэ үеэр А.Адъяасүрэн өөрт холбогдох хэргээр Нийслэлийн прокурорын газарт гомдол гаргасан байдаг. Уг гомдлын дагуу А.Адъяасүрэнг дээрх хэрэгт яллагдагчаар татсан тогтоолыг хүчингүй болгосон тухай Нийслэлийн Прокурорын газрын Ерөнхий прокурор Ш.Нямдорж 2021 оны 02 сарын 09-нд хариу мэдэгджээ.

Уг мэдэгдэлд “А.Адъяасүрэн таныг Өмнөговь аймгийн Цогтцэций сумын нутаг дахь "Эрдэнэс таван толгой ХК"-ийн уурхайгаас Гашуун сухайт- БНХАУ-ын нутаг дахь Ганц модны боомтын чиглэлд улс хоорондын байнгын ачаа тээвэрлэлт гүйцэтгэх С төрлийн бичиг гаргуулж, өөртөө давуу байдал бий болгох зорилгоор Авто тээврийн үндэсний төвын Тээвэр зохицуулалтын хэлтсийн дарга Г.Доржпаламд хахууль өгөхөөр амлаж, дээрх ажлын хэсгийн 2020 оны 3 дугаар сарын 19-ний өдрийн 6 дугаар хурлаар “Баянговь транс” ХХК-ийн 85, “Сан тээвэр групп” ХХК-ийн 190, “Топ транспорт” ХХК-ийн 30, Тэнгри транс” ХХК-ийн 172, “Ульгансар транс” ХХК-ийн 203 нийт 680 машинд улс хоорондын байнгын ачаа тээвэрлэлт гүйцэтгэх С зөвшөөрөл олгож шийдвэрлэсний хариуд түүний хүргэн Б.Габитаар дамжуулж, 100.000 америк долларын хахууль өгсөн гэмт хэрэг үйлдсэн гэж үзэн 2020 оны 5 сарын 19-ний өдөр Эрүүгийн хуулийн тусгай ангийн 22.5 дугаар зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татсан байна. 

Гэвч Эрүүгийн хэрэг хянан шийдвэрлэх тухай хуулийн 1.6.1, 1.6.2 дахь хэсэг зааснаар Эрүүгийн хэрэг хянан шийдвэрлэх ажиллагаа тасралтгүй явагдах, хянан шийдвэрлэх ажиллагаа хууль ёсны байх зарчим зөрчигдсөн байх тул танаас гаргасан гомдлын дагуу эрүүгийн хэрэг үүсгэж, яллагдагчаар татсан тогтоолыг хүчингүй болгон шийдвэрлэлээ” гэжээ.

Сонирхуулахад, УИХ-ын гишүүн А.Адъяасүрэн жилийн 800 гаруй сая төгрөгийн орлоготой, тэрбум 500 сая төгрөгөөр үнэлэгдэх үл хөдлөх хөрөнгөтэй, 800 сая төгрөгийн хадгаламж, 300 сая төгрөгийн үнэт эдлэлтэй гэж хөрөнгө орлогоо мэдүүлж байв.

Т.Хэрлэн