Өгөөдэй хааныг нас барсны дараа хатан Дөргэнэ нь долоон жил төр барьсан түүхийг сонсоогүй хүн ховор биз ээ. Хатан төр барьж байх хугацаандаа Фатима хэмээх эмтэй шадарлаж, энэ эмийн заавраар бишгүй олон үйлдэл, шийдэл гаргаж байсан гэх бөгөөд Алтан ургийнхан эврэлцэж, эгээтэй хоорондоо дайтаагүй (Чингис хааны дүү Тэмүгэ Дөргэнэ хатныг хаан ширээнээс буулгахаар зэвсэглэж байсан удаатай) энэ цаг үеийг XIII зууны Монголын хамгийн түүхийн хамгийн эгзэгтэй, ээдрээтэй нь байсан гэх нь бий.
Их Монгол Улсын төрийн эрх баригч хатны шадар хүн болж чадсан Фатима нь шулмын зан үйл хийх чадвартай байсан талаар олон домог яриа үлдсэн бөгөөд уран зохиолд ч тусгалаа олсон байдаг. Тэгвэл Монголын түүхийн яг энэ хэсгээр Японы “Science Saru” студи хүүхэлдэйн кино хийжээ. Манга буюу японы хүүхэлдэйн киноны уламжлалт хэв баягаар хийгдсэн уг бүтээл нь “Шулам бүсгүйн Монгол дахь амьдрал” (A Witch's Life in Mongol (Japanese: 天幕のジャードゥーガル, Hepburn: Tenmaku no Jādūgaru) гэдэг нэртэй бөгөөд Тус хотод эрдэм мэдлэгийг шүтсэн айлд зарцлагдаж, эрдэм мэдлэгт шимтэж байсан Фатима гэгч охин монголчуудын байлдан дагууллын үеэр Толуйн цэрэгт олзлогдож, улмаар Их Монгол гүрний нийслэлд хүргэгдэж ирснийхээ дараа өшөөгөө авахыг хичээж байгаа талаар гардаг байна. Монголын цэрэг Тус хотыг дайрах үеэр гэрийн эзэн нь Фатимаг хамгаалж байгаад амь үрэгдсэн нь түүнийг өшөө авахад хүргэсэн гэж уг кинонд гардаг ажээ.
Киноны трэйлер энэ сарын 14-нд youtube.com платформд тавигдсанаас хойш 73,000 удаа үзэгджээ.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна