Тээврийн хэрэгслийн татвараа цахимаар төлж, цаг заваа хэмнээрэй

Жолооч та тээврийн хэрэгслийнхээ татварыг E-Mongolia системээр хялбархан төлөх боломжтой боллоо. Хуулийн дагуу автотээврийн болон өөрөө явагч хэрэгслийн албан татварыг жил бүрийн зургаадугаар сарын 1-ний өдрөөс өмнө харьяа татварын албанд төлөх ёстой гэж заасан байдаг.

Хэрэв хугацаандаа төлөөгүй тохиолдолд таны тээврийн хэрэгсэл замын хөдөлгөөнд оролцох эрх хязгаарлагдах хүртэл арга хэмжээ авдаг гэдгийг анхаарна уу.

2025 оноос эхлэн татварын шинэ зохицуулалт мөрдөгдөж байгаа бөгөөд Нийслэлийн хэмжээнд бүртгэлтэй 718,000 тээврийн хэрэгслээс 228,710 нь татвараа төлөөд байна. Энэ нь нийт төлбөрийн гүйцэтгэл 40 гаруй хувь хүрээд буйг харуулж байна. Харин одоогоор 100,000 гаруй иргэн татвараа төлөөгүй байна.

E-Mongolia-гаар хэрхэн татвар төлөх вэ?

1. E-Mongolia системд өөрийн бүртгэлээр нэвтэрнэ;
2. Үйлчилгээнүүд хэсгээс “Татвар төлөх” үйлчилгээг сонгоно;
3. Тээврийн хэрэгслийн мэдээллээ шалгасны дараа, татвараа цахимаар төлнө.

Хувь хүн болон аж ахуйн нэгжийн татвар төлөх хугацаа

• Хувь хүн: Жил бүрийн зургаадугаар сарын 1-ний өдрөөс өмнө төлөх ёстой;
• Аж ахуйн нэгж, байгууллага: Улирал бүрийн сарын 25-ны дотор татвараа тэнцүү хуваан төлнө.

Хэрэв тээврийн хэрэгслээ бусдад шилжүүлсэн бол тухайн улирлын дараагаас эхлэн татварын үүрэг дуусгавар болдог.

Төлөөгүй тохиолдолд хүлээх хариуцлага:

• Замын хөдөлгөөнд оролцох эрх хязгаарлагдах;
• Хуулийн дагуу хариуцлага хүлээх эрсдэлтэй;
• Мөн 06 дугаар сарын 1-нээс хойш импортоор орж ирсэн автомашины татвар тухайн жилийн үлдсэн хугацаанд ногдох хэмжээгээр тооцогдоно.