"Ерөнхий сайд намайг үндэслэлгүйгээр гүтгэлээ. Тиймээс хуулийн байгууллагад шалгуулна"

Засгийн газрын 100 хоногтой тохиолдуулан Ерөнхий сайд Л.Оюун-Эрдэнэ мэдээлэл хийж, сэтгүүлчдийн сонирхсон асуултад хариулахдаа "Вакцинжуулалттай холбоотой асуудлыг улстөржүүлсэн олон асуудал байсан. Асуудлыг хурцатгаад яахав гэж чимээгүй явсан. Үүн дээр онцгой үүрэг гүйцэтгэсэн хүн бол УИХ-ын дэд дарга С.Одонтуяа байсан. Мөн түүний гэр бүлийн хүн Г.Өлзийбүрэн байсан. Гаалийн байцаагч нар руу утасдаж дарамталсан асуудал гарсан. Энэ асуудлыг би хууль хяналтын байгууллагад өгч шалгуулна гэж бодож байгаа. УИХ-ын дэд дарга хүн гаалийн байцааг ч руу утасдаад гаалиар ийм бараа оруулахгүй гэж хэлэх нь ёс зүйд нийцэхгүй. Миний хувьд хүндэлдэг хүний маань нэг. Гэтэл харамсмаар ийм үйлдэл гаргасан" гэсэн юм. 

УИХ-ын дэд дарга С.Одонтуяа үүнтэй холбогдуулан мэдэгдэл хийлээ. Тэрээр "Ерөнхий сайд тун хариуцлагагүй мэдэгдэл хийлээ. Манай нөхөр бол төрийн дээд албан тушаал хашдаг хүн биш. Миний хувьд вакцины татан авалтад нөлөөлөх ямар ч боломжгүй. Энэ бол цэвэр Засгийн газрын ажил. Өнөөдөр өглөө "45 мянга 500 хүний өвчлөл, 170 хүний амь насаар Засгийн газрынхаа 100 хоногийг угтаж байна" гэж шүүмжилсний төлөө намайг ямар ч үндэслэлгүйгээр гүтгэж байна. Тиймээс би хуулийн байгууллагад хандаж шалгуулна. Вакцины татан авалтыг нэг өдөр ч гацаах сэтгэл ямар ч монгол хүнд байхгүй" гэлээ.