Х.Баттулга МАН-тай “гар барьсан” ШАЛТГААН буюу Л.Оюун-Эрдэнийн төлөвлөгөө

Монгол Улсын Ерөнхийлөгч асан Х.Баттулга Ерөнхий сайд Л.Оюун-Эрдэнийн орон тооны бус зөвлөхөөр ажиллахаар болсон тухай мэдээлэл өчигдөр цацагдсан.

Түүнийг УИХ-ын 28 дугаар тойрог буюу Сонгинохайрхан дүүрэгт бие дааж нэр дэвшинэ гэсэн мэдээлэл хүчтэй явсан ч тэрбээр ийнхүү Ерөнхий сайдын орон тооны бус зөвлөхөөр ажиллахаар болсон нь, мөн үүн дээр МАН-ын нэг, хоёрдугаар хүн санал нийлж, дэмжсэн явдал ихээхэн анхаарал татаж байгаа.

Учир нь Өмнөх Засгийн газрыг огцруулахад оролцсон гэх дуулианд холбогдож байсан Ерөнхийлөгч асан Х.Баттулга хэдхэн сарын өмнө МАН-ыг тараахыг ард түмэндээ уриалж, шүүхэд хандаж байсан билээ.

Харин өнөөдөр Х.Баттулга МАН-ын удирдлага, Засгийн газартай хамтарч, бүр зөвлөж ажиллана гэдгээ ийнхүү зарлав.

Ерөнхийлөгч асан Х.Баттулга Ерөнхий сайд Л.Оюун-Эрдэнэтэй “гар барьсан” шалтгаан тодорхой. Төмөр замын асуудал, цаашлаад хууль хяналтын байгууллагатай орооцолдохгүй байх, өөрийнх нь гэгддэг сайд нарын суудал, тойрон хүрээлэгчдийнхээ нөлөөг хэвээр хадгалах гэж харж болно.

Ерөнхийлөгч асан, Ерөнхий сайд хоёрын уг “дотно” холбоог Л.Оюун-Эрдэнийн ах Херо Б.Баатар, зөвлөх А.Амундра нартай холбоход нэг чиг зөрөхгүй болов уу. Тэдний ард хэн байдаг, ямар ашиг сонирхол хэрхэн хөтөлж өдийг нь хүргэсэн нь улстөрийн хүрээнд хэдийнэ ил шахуу болсон билээ.

Ерөнхий сайд Л.Оюун-Эрдэнийн бас нэг гайхшруулсан томилгоо нь "Bloomberg" телевизийн гүйцэтгэх захирал асан Э.Долгион. Тэрбээр Ерөнхий сайдын орон тооны зөвлөх болов.

Засгийн газрын 200 хоногийн тайлан нэвтрүүлгийн үеэр Ерөнхий сайд Л.Оюун-Эрдэнэ Э.Долгионыг өөрийн зөвлөхөөр ажиллах нээлттэй гэдгийг хэлж байсан юм. Хариуд нь Э.Долгион "Яагаад болохгүй гэж" хэмээн хариулж байсан билээ.

 Тэгвэл уг яриа ийнхүү албажиж тэрбээр Ерөнхий сайдын зөвлөхөөр ажиллахаар болсон мэт харагдах ч улстөрийн өөр нэгэн бүлэглэлийн эрх ашгийг төлөөлөх вий гэх хардлага дагах нь тодорхой.

Худалдаа хөгжлийн банк буюу “Сахал” Д.Эрдэнэбилэгийн ойрын хүн гэгддэг Э.Долгион 2020 оны УИХ-ын сонгуулиар АН-аас Сүхбаатар дүүрэгт нэр дэвшсэн ч ялагдал хүлээсэн байдаг.

Гэвч түүний хийж буй томилгоонууд МАН-ын жирийн гишүүд, удирдлагын багийн зарим нөхдөд нь таалагдахгүй байгаа бололтой.

Тухайлбал, УИХ-ын гишүүн Ү.Хүрэлбаатар "Эсгий хийх газар нохой хэрэггүй" хэмээн нийгмийн сүлжээнд дургүйцлээ илэрхийлсэн харагдана лээ.

Харин Ерөнхий сайд Л.Оюун-Эрдэнэ өрсөлдөгч нам, үзэл баримтлалын ялгаа, бизнесийн бүлэглэл хоорондын зөрчлийг үл тоож, бүгдтэй нь гар барихыг, тэдний эрх ашгийг хангаж байж, суудалдаа тэсч үлдэх боломжтой гэж харсан бололтой.

Цаашид МАН ба бусад гэх ганц л томъёотой болсон Монголын улстөр хэрхэн үргэлжлэхийг бид нийтээрээ харах л дутуу байна даа.....