Гишүүнээсээ ТҮТГЭЛЗЭХЭЭС АЙСАН А.Адъяасүрэн тойргоо усалж явна уу

УИХ-ын гишүүн А.Адъяасүрэнд холбогдох авлигын хэрэгт прокуророос яллах дүгнэлт үйлдэж, шүүхэд шилжүүлэхээр болсон. 

Тодруулбал нүүрс тээвэртэй холбоотой авлига, албан тушаалын хэрэгт холбогдуулан яллах дүгнэлт үйлдсэн талаар эх сурвалжууд мэдээллэв. Түүнийг яллагдагчаар татан шалгасан ч тэр хэргийн материалтайгаа танилцалгүй үйл явцыг удаашруулж байгаа гэлээ. 

Нөгөө талаар УИХ-ын гишүүн учраас бүрэн эрхийн асуудал үүсээд байгаа юм. Түүний бүрэн эрхийг УЕП түтгэлзүүлэх саналыг УИХ-д хүргүүлж, дэмжигдсэнээр шүүхийн процесс өрнөх юм. 

Энэ талаар ч Ерөнхий сайд Л.Оюун-Эрдэнэ нүүрсний бизнесээс мөнгө завшдаг бүлэглэл бий бөгөөд үүнд олон нөлөө бүхий лидерүүд байгаагийн нэг нь УИХ-ын гишүүн А.Адьяасүрэн хэмээн хэлж байсан.

Тэрбээр "Сүүлийн 17-20 жилийн хугацаанд нүүрс зарахдаа тонн тутамд 60-70 орчим ам.долларыг завшиж байсан бүлгийг илрүүлэх ажлын хэсэг байгуулагдсан. Үүнээс маш сонин зүйл харагдана. Зөвхөн энэ далд эдийн засаг цэгцэрвэл Монгол Улсын дотоодын нийт бүтээгдэхүүн 2 дахин тэлэхээр байгаа.Тэнд маш их хэмжээний автомашинууд бий. Автомашин дотор манай парламентын гишүүд холбогдсон байгаа. А.Адьяасүрэнгээс эхлүүлээд. Цаана нь маш олон нөлөө бүхий лидерүүд гарч ирнэ. Ингээд цаашаа Баяннуур аймагт байгаа нөлөө бүхий хүмүүстэй холбогдоно. Татвар төлдөггүй, хэн ч бүртгэдэггүй далд эдийн засаг Гашуун сухайтын төмөр замыг 10 гаруй жил гацаасан. Учир нь маш их ашигтай байсан. Тун удахгүй автомашины томоохон жагсаал болно. Ийм зүйлд битгий хөтлөгдөөрэй гэж олон нийтэд уриалмаар байна" хэмээж байсан юм.

Тэгвэл А.Адъяасүрэн гишүүн гишүүний бүрэн эрх нь түтгэлзэж, хуулийн байгууллагад шалгагдахаас айсан мэт тойргийнхоо багийн засаг дарга нарт хадаг бариад, мотоцикл бэлэглэн "тойргоо усалж явна".

Тойрогтоо хийх хөрөнгө оруулалтын дөрвөн тэрбумаасаа "Багийн засаг дарга нарыг чадавхжуулах төсөл" хэрэгжүүлж, үүнийхээ хүрээнд багийн засаг дарга нарт мотоцикл бэлэглэж байгаа нь энэ юм байна.