Ерөнхийлөгчийн заналхийлэл ба Ковидын үеийн улс төр

Дэлхий нийтийг цочирдуулсан цар тахал манай улсад “нүүрлэж”, хөл хорионд сэтгэлзүйн хувьд хүндхэн суугаа ард түмнээ төрийн тэргүүн уржигдар бүх нийтээр нь бухимдуулав.

Эмнэлгүүд ачааллаа дийлэхээ больж, боломжтой газруудад ор дэлгэж, эмч нар хүртэл өвдөж сайн дурынхныг хүртэл дайчилж буй энэ хэцүү цаг үед улстөрчдийн увайгүй олон үйлдлийг харцгааж байна.

Өчигдөр л гэхэд улстөржсөн шийдвэрүүдээс улбаалж, эмч нар гудамжинд гарч ирэн, мэдэгдэл хийлээ. Тэд эмч, мэргэжилтнүүдийн үгийг шийдвэр гаргагчид үл тоосон, одоо улс төрийн зорилгоор гүтгэж сэтгэл санаагаар унагаж байгааг хэлэв. 

Араас нь “Цэрэг арми хөдөлгөх гэж байна” гэсэн цуурхалаас болж Монголын Зэвсэгт хүчин бас хэвлэлийн бага хурал зарлан бужигналаа. 

Учир нь даваа гаригт Монгол Улсын Ерөнхийлөгч Х.Баттулга эрх баригч МАН-ыг тараах захирамж гаргаснаа мэдэгдсэн даруйдаа ЗХЖШ-ыг зорьсон. Саяхан л цэрэг зодуулж нас барахад, хил дээр буун дуу гарч байхад чив чимээгүй байсан Зэвсэгт хүчний ерөнхий командлагч Х.Баттулга өөрөө гэнэт тэнд гүйж очсон нь ийнхүү хардлага улстөржилтөд өртсөн. 

За ингээд, “дайран дээр давс” гэгчээр Д.Ганзориг генерал “Зэвсэгт хүчнээ улс төржүүлэх, улс төрийн үйл ажиллагаа, хямралдаа цэрэг, арми татан оруулснаар иргэний дайнд хүргэж байсан гашуун түүх манай сайхан оронд битгий тохиолдоосой” гэв. 

Эрхэм генералд хэн юу хэлчихсэн болоод иргэний дайны тухай сануулж, иргэдээ айлгаж сүрдүүлнэ вэ. Дээр нь сүүлийн өдрүүдэд Ерөнхийлөгч Х.Баттулгыг дэмжигчдийн зүгээс илтэд иргэний дайнд өдөөн хатгаж, элдэв зүйлд  уриалан дуудаж байгаа энэ цаг үед ноён генералын үг илүүдэж, иргэдэд айдас, болгоомжлол төрүүлэв. 

Ерөнхийлөгчийн эрх барьж буй намыг тараах санаачилга гаргасан нь Монголын ардчилалд заналхийлсэн үйлдэл болсныг тодотгож, байр сууриа илэрхийлэх улстөрчид цөөнгүй байна.

Тухайлбал, Ерөнхийлөгчийг Төрийн ордонд мэдэгдэл хийсний дараа хотын дарга асан Э.Бат-Үүл “Монгол Улсын Ерөнхийлөгчийн зарлиг хуульд нийцсэн байх ёстой. Ерөнхийлөгч уурлахаараа нам тараадаг Үндсэн хууль, хуульд нийцээгүй жишиг тогтоовол ардчилал устаж байгаа нь тэр” гэсэн бол Монгол Улсын дөрөв дэх Ерөнхийлөгч Ц.Элбэгдорж өчигдөр фэйсбүүк хуудсаарaa дамжуулан олон нийтэд хандахдаа “Ерөнхийлөгчийн сонгууль угтсан халуурал эрчээ авч байна.

 Ер нь энэ талцал, улайрал хэрээс хэтэрлээ. Энэ байдлыг өдөөгчдөд жолоогоо тат, нүдээ нээ, орчны мэдрэмжээ сэрээ, ард иргэдээ бод гэж хэлье. Асуудлыг хуулиар шийдье, хэлэлцэж ярилцаж, нээлттэй шийдвэрлэе, хариуцлагаа ч тооцъё. Хуультай юм, сонгуулиа ч хийе. Эцсийн эцэст хэн Ерөнхийлөгч байхыг сонгогчид л шийднэ” хэмээн байр сууриа илэрхийлжээ.