“Ерөнхийлөгчийн марш тактик” тэмцээнд бэлдэж байсан 41 хүнээс коронавирус илэрчээ

Сонгинохайрхан дүүргийн  XXII хорооны нутаг дэвсгэр, Орбитод байрлах онцгой байдлын харъяа Аврах тусгай ангид дөрөвдүгээр сарын 6-наас тавдугаар сарын 13-ны өдөр хүртэл бэлтгэл хийхээр байрласан 56 алба хаагчдын дунд коронавирусийн халдвар тархаж, голомт болсон гэх ноцтой мэдээллийг өчигдөр нэгэн иргэн манай сайтын редакцид хандан өгсөн юм. 

Эх сурвалжийн мэдээлж буйгаар бэлтгэл хийж байсан 30 эрэгтэй, 11 эмэгтэй алба хаагч халдвар авсан. Одоо заримынх нь биеийн байдал хүнд байгаа аж.

Энэ талаар Улсын Онцгой комиссын Шуурхай штабын дарга Ц.Ганзоригоос тодруулахад “Ерөнхийлөгчийн нэрэмжит марш тактик тэмцээний бэлтгэлд гарсан байсан алба хаагчдаас коронавирусийн илэрсэн. Тухайн үед 12 хүнээс илэрсэн талаар мэдээлсэн байгаа. Улмаар ОБЕГ-ын харьяа "Онцгой жаргалант" сэргээн засах сувилалд тусгаарласан. Сүүлийн үеийн тодорхой мэдээллийг ОБЕГ-аас авах нь зүйтэй болов уу” гэв.

ОБЕГ-ийн холбогдох албан тушаалтнаас тодруулахад, “Өнөөдрийн байдлаар 40 гаруй алба хаагчдаас коронавирус илэрсэн. Одоо тусгаарлагдан эмчлүүлж байгаа.” гэлээ.

Сануулахад, Монгол Улсын Ерөнхийлөгч, Зэвсэгт хүчний Ерөнхий командлагчийн нэрэмжит, Үндэсний аюулгүй байдлыг хангах тусгайлсан чиг үүрэг бүхий байгууллагуудын дунд жил бүр Марш тактикийн аварга шалгаруулах тэмцээнийг зохион байгуулдаг. Харин энэ жилийн хувьд коронавирусийн халдварын тархалт нэмэгдсэнтэй холбоотойгоор Засгийн газраас энэ сарын 10-наас  эхлэн зарласан Бүх нийтийн бэлэн байдлын хугацааг дахин 14 хоногоор сунгасан. Ингэхдээ хатуу хөл хорионы үеэр ямар нэгэн спортын арга хэмжээг бүр мөсөн хориглосон.

 Гэтэл  уг шийдвэрийг зөрчиж, олон хүний эрүүл мэнд, амь насыг эрсдэлд оруулсан байх юм. Уг асуудалд ямар арга хэмжээ авч ажиллаж байгаа болон хариуцлагын талаар бид тодруулан хүргэнэ.