Н.Алтанхуяг: Хуулиараа Х.Баттулга нэр дэвших ёстой байсан

Өнөөдөр Монгол Улсын найм дахь Ерөнхийлөгчийн сонгуульд өрсөлдөх нэр дэвшигчид СЕХ-нд материалаа өглөө. АН-ын тамганы асуудал шүүх дээр маргаантай байгаа учир АН-аас нэр дэвшигч Н.Алтанхуягийн материалыг хүлээж авах хугацааг СЕХ-оос хойшлуулсан юм. 

;;Улс төрийн намууд дангаараа болон хамтарч зөвхөн нэг хүнийг нэр дэвшүүлнэ гэсэн хуулийн заалт байдаг. Нэг намаас нэг нэр дэвшигч тодорно. Бид нэг намаас зөвхөн нэг материал авах ёстой. Тиймээс бид АН-аас материал хүлээж авах хугацааг хойшлууллаа. Өнөөдрийн 18:00 цагаас та бүхний шийдвэрийг хүлээж байя'' хэмээн СЕХ-ны дарга П.Дэлгэрнаран өгүүлжээ.

Үүнд хариу болгож УИХ-ын гишүүн Н.Алтанхуяг: 

СЕХ нэг нам хоёр болсон гэж худал ярьдаг байгууллага биш. МАН-ын дарга У.Хүрэлсүхэд шулуухан хэлчихье. Чи хаан болчихсон юм шиг битгий олон юм ярь. МАН төрийн дээр гарсан байна.  Уг нь СЕХ бол УИХ-аас байгуулагддаг байгууллага. Гэтэл МАН-ын дор орсон байна. 

Бид үнэхээр нэг намын дарангуйлалд орчхож. АН хуваагдаагүй. Хоёр АН гэж байхгүй. АН-ыг хуваах гэж МАН жигшүүртэй үйлдэл хийсээр байна. Үүнийг засах хэрэгтэй. 

1-рт, АН-ын тамга бүртгэлтэй хэвээрээ байгаа. Иргэний бүртгэлийн ажилтан захиалгаар тамга хийж болохгүй. Тэр байцаагчийн хийсэн тамгыг түдгэлзүүлсэн. 2 дугаар сарын 2-ноос хойш тамга нь хүчингүй. 

У.Хүрэлсүхийн даалгаврыг биелүүлэхээ больцгоо та нар. Ард түмний сонголтыг та нар хүндэл. 

2-рт, УИХ-ын 13 гишүүн энэ намд байна. Бидэнд бүх бичиг цаас нь байгаа. Үнэхээр шившигтэй юм болж байна. 21 аймаг, 9 дүүргийн намын гишүүд О.Цогтгэрэлийг даргаараа сонгосон. АН-ын нэр дэвших эрхийг хаадаг та нар хэн бэ. СЕХ бүртгэхгүй гэх юм бол бид Монголын ард түмэнд хандана. Би 31 жилийн өмнө ийм болохын төлөө яваагүй. Захиалга биелүүлэхгүй шүү. Хуулиараа Х.Баттулга нэр дэвших ёстой. Гэтэл ҮХЦ-ийн гишүүдийг нь дарамталж байгаад шийдвэр гаргуулсан. 

Бүх бичиг баримтад ганцхан нам байна. С.Эрдэнэ гэдэг хүнийг цаанаас нь захиалсан. Чамд хойшлуулах эрх байхгүй. Би эндээс гарахгүй" гэлээ.