Б.Бямбадорж: Түргэн тусламжийн төв, “Энэрэл” эмнэлгийн захирлуудад ХАРИУЦЛАГА ТООЦНО

Ковид19-ийн халдвартай хүн эмнэлгийн гадаа тусламж авч чадалгүй нас барсан хэрэг өчигдөр гарсан. Энэ талаар Нийслэлийн эрүүл мэндийн газрын дарга Б.Бямбадорж мэдээлэл хийлээ. 

Тэрээр " Юуны өмнө талийгаачийн ар гэрээс уучлал хүсэж байна. Талийгаач долоодугаар сарын 2-нд түргэвчилсэн шинжилгээгээр эерэг хариу авсан, уушгины рентген зургаар хатгаа авсан нь тодорхой байсан тул өрхийн эрүүл мэндийн төвөөс эмч очиж үзээд харьяа эмнэлэгт хандахыг зөвлөөд буцсан. Талийгаач “Энэрэл” эмнэлэгт хандсан ч тус эмнэлэгт хэвтэх хүмүүсийн нэрсийн жагсаалтад нэр нь байгаагүй учраас Баянзүрх дүүргийн нэгдсэн эмнэлэг рүү  явуулсан байна. Харин БЗД-ийн нэгдсэн эмнэлэг “Энэрэл” эмнэлэг рүү буцаажээ. Эргээд "Энэрэл" эмнэлгийн хашаанд орж ирэхэд ХӨСҮТ рүү хүнд өвчтөнөө хүргэж өгөөд буцаж ирсэн эмнэлгийн машины жолооч таарч түргэн тусламж дуудсан байна. Түргэн тусламж таван минутын дараа ирэхэд тухайн иргэн нас барсан байсан. Тусламж үйлчилгээний явцад анхан шатны тусламж үйлчилгээ үзүүлэхдээ хариуцлагагүй байдал гаргасан түргэн тусламжийн төвийн захирал, “Энэрэл” эмнэлгийн захирлуудад хариуцлага тооцно. БЗД-ийн нэгдсэн эмнэлэг хувийнх учраас төлөөлөн удирдах зөвлөлийн менежментийн багийг өөрчилнө. Удаа дараагийнх учраас БЗД-ийн нэгдсэн эмнэлэгт яаралтай арга хэмжээг авна” гэлээ.

Түүнчлэн өндөржүүлсэн бэлэн байдалд мэргэжлийн удирдлагаар хангах үүргээ биелүүлээгүй, ажлын байраа орхиж явсан НЭМГ-ын Эмнэлгийн тусламжийн хэлтсийн дарга М.Мөнхдэлгэрийг үүрэгт ажлаас нь чөлөөлөхөөр боллоо.