Ажиллах насандаа нийгмийн даатгал төлж, нас дээр гарахдаа тэтгэвэр болгож авдаг юм шүү Г.Мөнхцэцэг гишүүн ээ!

Өчигдрийн /2022.01.28/ УИХ-ын ээлжит бус чуулганаар 2022 оны төсөвт тэтгэвэр нэмэх асуудлаар тодотгол хийх талаар хэлэлцсэн. 

Энэ үеэр УИХ-ын гишүүн Г.Мөнхцэцэг "Тэтгэвэр гэдэг бол орлого, цалин биш. Улс орныхоо төлөө зүтгэж, гар, хөлөө хөдөлгөн ажилласан ахмадуудаа төрөөс харж байгаа дэм гэж ойлгож байгаа. Монгол Улсын хэмжээнд 420 мянган иргэн тэтгэвэр авдаг. Тэтгэвэр авагчдын 50 хувь нь 350 мянгын тэтгэвэр авдаг. Энэ бол харамсалтай тоо. Санхүүжилтийг тодорхой болгоно гэж итгэж байгаа" гэсэн нь олны дургүйцлийг хүргэсэн юм.

Энэ нь ямар нэг хуулийн үндэслэлгүй, өр үндэсгүй худал зүйл бөгөөд хөдөлмөр эрхлэх насандаа цалингийн тодорхой хувийг нийгмийн даатгалд төлж нийгмийн даатгалын санг бүрдүүлж, улмаар уг сангаас өндөр наслах гэх мэт тодорхой тохиолдлуудад тэтгэвэр, тэтгэмж өгдөг юм. 

Нийгмийн даатгал гэж юу вэ?
Нийгмийн даатгал гэж даатгалын сан бүрдүүлж, уг сангаас даатгуулагч өндөр наслах, хөдөлмөрийн чадвараа алдах, ажилгүй болоход өөрт нь, даатгуулагч нас барахад түүний асрамжинд байсан хөдөлмөрийн чадваргүй гишүүдэд нь тэтгэвэр, тэтгэмж, төлбөр өгч эрсдлээс хамгаалах арга хэмжээг хэлнэ.

Даатгуулагч гэж хэн бэ?

Нийгмийн даатгалын санд шимтгэл төлж даатгуулсан, нийгмийн даатгалын сангаас тэтгэвэр, тэтгэмж, төлбөр авах эрх бүхий этгээдийг хэлнэ.

Тэгвэл тэтгэвэр гэж юу вэ?

Даатгуулагчийг өндөр наслахад нь насан туршид нь, тахир дутуу болоход нь хөдөлмөрийн чадвар нь сэргээгдэх хүртэл, нас барахад нь түүний гэр бүлийн хөдөлмөрийн чадваргүй гишүүд /хүүхэд 16 нас, сургуульд суралцаж байгаа бол 19 нас хуртэл/-ийн нийгмийн баталгааг хангах зорилгоор нийгмийн даатгалын сангаас сар бүр олгох мөнгөн хөрөнгийг хэлнэ.

УИХ-д хоёр ч удаа сонгогдсон яруу найрагч гишүүн маань мэдлэггүй гэх үү, мэдээлэлгүй гэх үү, тэтгэвэр авч буй 420 мянган иргэнийг төрөөс харж үзэж байна иргэд дэм аваад сууж байгаа хэмээн "доромжлов". 

Мэдлэгтэй, мэдээлэлтэй, боловсролтой гишүүд энэ парламентад байгаа ч тэтгэвэр гэж юу байдгийг ч мэдэхгүй Г.Мөнхцэцэг нарын гишүүдийг хууль, эрх зүйн сургалтад суулгахгүй бол энэ мэт иргэд сонгогчдынхоо итгэлийг "алдаж", нүүрийг нь "улайлгасаар" байх нь ээ. 

Ажиллах насандаа нийгмийн даатгал төлж, төлсөн мөнгөө тэтгэврийн насанд хүрэхдээ сар бүр тодорхой тогтоолгосон хэмжээгээрээ авдаг юм шүү Г.Мөнхцэцэг гишүүн ээ!