Б. Алтанцэцэг: Бид Үндсэн хуульд нэмэлт өөрчлөлт оруулахыг эсэргүүцэж тэмцэнэ

Өнөөдөр “Аюулгүй байдлын төлөө ээжүүдийн холбоо” ТББ, “Газар тэнгэр гал нэгдэл” НҮТББ, Орон нутгийн төлөөлөлүүд хамтран МУ-ын Ерөнхийлөгчид дахин шаардлага хүргүүлэн мэдэгдэл хийлээ.

Дээрх төлөөллүүд хийсэн мэдэгдэлдээ:

"Сүхбаатар жанжны талбайд иргэдийн санал хүсэлтийг сонсож өдөрт 500 орчим гарын үсэг зуруулан Монгол улсын ерөнхийлөгч У.Хүрэлсүхэд тусгаар тогтнол, үндэсний аюулгүй байдалд учирч болзошгүй аюултай нөхцөл байдлыг тайлбарлаж шаардлага гардуулсан. Гэтэл ерөнхийлөгч хариу өгсөнгүй. Ерөнхийлөгчийг төлөөлж үндэсний аюулгүй байдлын зөвлөлийн ажлын албаны дарга Д. Ариунболдын өгсөн хариу шаардсан асуултыг ойлгоогүй байна гэж дүгнэхэд хүргэлээ. Иймд бидний зүгээс Монгол улсын ерөнхийлөгч У. Хүрэлсүхэд дахин шаардлага хүргүүлэх болно” гэлээ. 

Тэдгээрийн дахин тавьж буй шаардлага нь:

• Монгол улсын Үндсэн хуулинд нэмэлт өөрчлөлт оруулахыг эсэргүүцэж
• Монгол улсын нөхцөл байдал хүнд үед хүнсний хангамж аюулгүй байдал баталгаатай талаар
• Усны нөөц хомсдож байгаа талаар төрөөс бодлого гаргаж ажиллах
• Вакцинаас болж нас барсан эрүүл мэндээрээ хохирсон хохирогчдын нөхөн олговорыг бусад улсын жишгээр олгуулах Монгол улсын ерөнхийлөгч Үндэсний аюулгүй байдлын тухай хуулийн 8,2 дахь хэсэгт заасны дагуу Үндэсний аюулгүй байдлыг судлан тогтоож хангаж ажиллахыг шаардсан болно” гэв.

“Аюулгүй байдлын төлөө ээжүүдийн холбоо” ТББ-ын тэргүүн Б. Алтанцэцэг:  "Сүүлийн хэдэн жилд монголын язгуур эрх ашгийн төлөө баталсан хууль байхгүй. Болж бүтэхгүй хуулиудыг дандаа улсын баяр, наадам, битүүний орой зэрэг бид нарын анхаарал сарнисан үед баталсан. Тийм учраас бидний гол зорилго бол монгол түмний эсрэг янз бүрийн муу муухай хууль бүү батлаасай! Долоон сарын 9-нд Үндсэн хуулинд нэмэлт өөрчлөлт оруулах талаар яригдаж байна. Тэгвэл бид Үндсэн хуульд нэмэлт өөрчлөлт оруулахыг эсэргүүцэж тэмцэнэ" гэлээ. 

Б. Оргил