Гурав дахь яамныхаа сайдын суудалд суух ХНХ-ын сайд Д.Сарангэрэл гэж ХЭН БЭ?

Хөдөлмөр нийгмийн хамгааллын сайдаар томилогдох болсон УИХ-ын гишүүн бол Эрүүл мэндийн сайд асан Д.Сарангэрэл юм.

Түүний хувьд өмнө нь БОАЖ-ын сайд, Эрүүл мэндийн сайдаар ажиллаж байсан.

Тэгвэл хоёр яамны нүүрийг үзсэн өдгөө гурав дахь яамныхаа сайдын суудалд суух болсон Д.Сарангэрэл гэж хэн бэ? 

Тэрбээр 1963 онд Улаанбаатар хотод төрсөн, 59 настай. 1979 онд Нийслэлийн 57 дугаар сургууль, 1983 онд ЗХУ-ын Омск хотын Технологийн техникум, 1990 онд ЗХУ-ын Ростов хотын Улсын Их сургууль, 2005 онд ОХУ-ын Москвагийн Их сургуулийг тус тус төгссөн. Сэтгүүлч мэргэжилтэй. Сэтгүүл зүйн ухааны магистр зэрэгтэй.

Ажилласан байдал:

• 1982-1985 онд Монголын радио, телевизийн улсын хорооны харьяа гэрэл зургийн газарт өнгөт зургийн лаборант,
• 1990-1992 онд Монголын Үндэсний телевизэд сурвалжлагч-редактор, ахлах редактор,
• 1992-1996 онд Нийслэлийн Иргэдийн Хурлын төлөөлөгч,
• 1993-2003 онд Монголын үндэсний телевизийн “ММ агентлаг”-т хариуцлагатай редактор, ерөнхий редактор, захирал,
• 2003-2005 онд “ТВ5” телевизийн ерөнхий захирал,
• 2005-2010 онд Монголын сэтгүүлчдийн нэгдсэн эвлэлийн Ерөнхийлөгч,
• 2011-2012 онд Монгол Ардын Намын Нарийн бичгийн дарга,
• 2012 оноос одоог хүртэл Монгол Улсын Их Хурлын гишүүн,
• 2016-2017 онд УИХ-ын Өргөдлийн байнгын хорооны дарга,
• 2017-2020 онд Монгол Улсын Засгийн газрын гишүүн,
• Эрүүл мэндийн сайд, 2020-2021 онд Байгаль орчин, аялал жуулчлалын сайдаар ажиллаж байсан.

Д.Сарангэрэл нь шинээр томилогдож буй арван сайдын хамгийн өндөр орлоготой сайдаар тодроод буй. Мөн 2017 оноос хойш түүний орлого 3 дахин өссөн үзүүлэлттэй байгаа юм. Түүний 2021 оны хөрөнгө, оролгын мэдээллийг танилцуулж байна. 

• Хувийн орлого- 39 сая 530 мянга.59
• Гэр бүлийн орлого- 3 тэрбум 119 сая 845 мянга
• Орон сууц барилга- 500 сая 876 мянга /Үйлчилгээний 2, Нийтийн О.С/
• Машин 60 сая
• Хадгаламж 501 сая 148 мянга