Үер усны гамшгаас сэргийлэх бэлэн байдлын удирдамж, чиглэлийг бүх шатны байгууллагууд хэрхэн хангаж буй талаар хяналт хийж УОК-ын Шуурхай Штабт ажиллаж байна.
Маргааш буюу энэ сарын 21-нээс эхлэн төв болон зүүн аймгуудын нутгаар үргэлжилсэн усархаг, дуу цахилгаантай аадар бороо орж, ихэнх нутгаар эрс сэрүүсэх төлөвтэй байгаа тул Монгол Улсын Шадар сайд С.Амарсайхан УОК-ын Шуурхай штабт ажиллаж, аймаг, нийслэл, орон нутгийн байгууллагуудтай цахимаар хуралдан үүрэг даалгавар өглөө.
Сүүлийн 10 жилийн судалгаанаас дүгнэхэд Улаанбаатар хотод үерийн аюул нэмэгдэх хандлагатай байгаа бөгөөд Баянзүрх, Сонгинохайрхан, Сүхбаатар, Чингэлтэй, Хан-Уул, Налайх дүүргүүд хамгийн их эрсдэлтэйд орж байна. Улаанбаатар хотын үерийн эрсдэлийн үнэлгээгээр үерийн аюултай бүсэд 2063 айл өрх суурьшиж байгаагийн 444 нь зөвшөөрөлгүй бөгөөд тэдгээр айл өрхийг болзошгүй аюул эрсдэлээс сэргийлэх, үерийн далан, суваг шуудууг хүчитгэх чиглэлээр ажиллаж байгааг албаныхан хэлэв.
Монгол Улсын Шадар сайд С.Амарсайхан “Үргэлжилсэн усархаг, хүйтэн борооны улмаас гол усны түвшин нэмэгдэх, ноосолсон хонь мал осгох, шуурганд уруудсан малынхаа хойноос явж хүн эрсдэх гэх мэт аливаа аюул эрсдэлээс сэргийлж хаана хаанаа болгоомжтой байх нь чухал. Сонгууль болдгоороо болоод дуусна. Ажил, амьдрал цааш үргэлжилнэ. Байгалийн гамшиг, үер усны аюул эрсдэлийг тооцоолж, бүх шатны төрийн байгууллагууд бэлтгэл, бэлэн байдлаа хангаж, урьдчилан сэргийлэх зохион байгуулалтаа сайжруулах хэрэгтэй” хэмээн санууллаа
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна