Сэтгүүлч Н.Өнөрцэцэгийн аав, ээж төрийн гурван өндөрлөгт хандана

Zarig.mn сайтын эрхлэгч, сэтгүүлч Н.Өнөрцэцэгийн аав, ээж өнөөдөр /2024.07.23/ Ерөнхийлөгч, УИХ-ын дарга, Ерөнхий сайд нарт хандахаар болжээ.  Тодруулбал, 11.00 цагт төрийн гурван өндөрлөгт хүсэлтээ уламжилж, Төрийн ордны баруун хаалган дээр сэтгүүлчдэд мэдээлэл өгөх нь ээ.  

Н.Өнөрцэцэгийг шүүх хурал өнгөрсөн долоо хоногийн пүрэв, баасан гарагт өмгөөлөгчгүй, хаалттай болж, дөрвөн жил, есөн сарын хорих ял оноогоод буй. Түүний хувьд хорих 461-р ангид хоригдож байгаа юм.

Түүнийг: 

• “Нэр бүхий 4 иргэн, 1 хуулийн этгээдийн нэр төр, алдар хүнд, ажил хэргийн нэр хүндэд халдсан илт худал мэдээллийг олон нийтэд тараасан”
• “Хувь хүний хуулиар хамгаалагдсан нууцыг олж мэдсэн хүн өөрийнх нь зөвшөөрөлгүйгээр цахим сүлжээ ашиглаж задруулсан”
• “Татвар төлөгч хувь хүн, хуулийн этгээдийн удирдах, гүйцэтгэх албан тушаалтан татвар төлөхөөс зайлсхийх зорилгоор их хэмжээний татвар ногдох орлогоо зориуд худал тодорхойлсон, нуусан”
• “Татвар төлөхөөс зайлсхийх гэмт хэргийн улмаас олсон хөрөнгө, мөнгө, орлого гэдгийг мэдсээр байж ашигласан”
• “Төрийн нууцад хамаарах мэдээ, баримтыг хадгалсан” гэмт хэрэг үйлдсэн гэм буруутайд тус тус тооцсон хэмээн Сүхбаатар дүүргийн Эрүүгийн хэргийн анхан шатны шүүхээс албан мэдээгээр мэдээлсэн.

Н.Өнөрцэцэг нь гурван өмгөөлөгчтэй бөгөөд өмгөөлөгч нар нь давж заалдана гэдгээ мэдэгдээд буй билээ.

Э.БУЛГАН