Н.Өнөрцэцэг: Шүүхээс ялыг минь хөнгөлөөд өг гэж гуйхгүй. Гагцхүү баримтаар нотлогдсон эсэхэд хяналт тавьж, үнэн зөвөөр шүүж өгөөч

Сэтгүүлч Н.Өнөрцэцэгт анхан шатны шүүхээс 4.9 жилийн хорих ял оногдуулсан. Түүнийг Эрүүгийн хуулийн 13.11 дүгээр зүйлд заасан “Хувь хүний нууцыг задруулах”, 13.14 дүгээр зүйлд заасан “Худал мэдээлэл тараах”, 18.3 дугаар зүйлд заасан “Татвар төлөхөөс зайлсхийх”, 18.6 дугаар зүйлд заасан “Мөнгө угаах”, 19.11 дүгээр зүйлд заасан “Төрийн нууцыг хууль бусаар олж авах” гэх таван зүйл ангиар буруутгасан юм. Н.Өнөрцэцэгийн зүгээс “Шүүх хурлыг өмгөөлөгчгүйгээр, хаалттай явуулж намайг хэлмэгдүүллээ” гэж үзэж байгаа юм. 

Тиймээс сэтгүүлч Н.Өнөрцэцэг 2024.08.13-нд давж заалдах шатны шүүхэд хандсан юм. Мөн давж заалдах шатны шүүх хурлыг нээлттэй явуулж өгөх хүсэлтээ хавсарган өгсөн байна. 

Тэрбээр 461 дүгээр нээлттэй хорих ангид байгаа бөгөөд "Шүүхээс надад оногдуулсан ялыг хөнгөлөөд өг гэж гуйхгүй. Гагцхүү баримтаар нотлогдсон эсэхэд хяналт тавьж, үнэн зөвөөр шүүж өгөхийг хүсч байна" хэмээн өмгөөлөгчөөрөө дамжуулан хэлүүллээ. 

Дашрамд дурдахад, Зариг.мн сайтын эрхлэгч, сэтгүүлч Н.Өнөрцэцэгийн холбогдоод буй хэргүүд нь олон нийтийн мэдэх эрхийг хангахын төлөө ажилласан түүний сэтгүүлчийн ажилтай холбогдох бөгөөд түүний огт мэдэхгүй цаас ч түүнд холбогдох хэргийн нэг болоод буй нь хачирхалтай. Тиймээс түүнийг буруутгаж буй үйлдэл нь хэвлэлийн эрх чөлөөнд халдаад зогсохгүй, Монгол Улсын иргэнийг үндэслэлгүйгээр буруутгаж, ял тулган хүний эрх, эрх чөлөөг нь хязгаарлаж буй хууль бус үйлдэл гэж олон нийт дүгнэж байгаа юм.