"МАК Тауэр"-т хийж буй хамгаалалтын хана "КН Апартмент"-ад ямар нэг сөрөг нөлөө үзүүлээгүй гэх дүгнэлт гарчээ

"Монголын Алт" ХХК нь Хан-Уул дүүргийн 15 дугаар хорооны нутаг дэвсгэрт байрлах "Мак Тауэр"-ын барилгын ажлыг эхлүүлэхдээ хажуу талын орон сууц болох “KH Апартмент” хотхоны 6Д, 6Е байрны суурийг ил гартал ухсан дүр зураг олон нийтийн сүлжээнд цацагдаж, манай сайтын редакц сурвалжлан хүргэж байсан билээ.

Тухайн үед "Монголын Алт” ХХК-ийн зүгээс “Мэргэжлийн байгууллагын заавар, зөвлөмж дор экспертээр батлагдсан дүр зураг төсөл, стандартын дагуу хамгаалалтын шон, суурь цутгаж байгаа" гэж мэдэгдэж байсан. Тодруулбал, тус компанийн барьж байгаа ажил нь зэргэлдээ барилгуудад ямар нэгэн өөрчлөлт оруулахгүй гэсэн байр суурь илэрхийлж байсан юм. 

Тэгвэл ШУТИС-ийн Геотехникийн судалгааны төвөөс "KH Апартмент" хотхоны 6Д, 6Е дугаартай барилгын суурьт өөрчлөлт орсон эсэхэд шинжилгээ хийж, тус хотхоны СӨХ-д дүгнэлтээ хүргүүлжээ.

Дүгнэлтэд "...газар хөдлөлт зэрэг их хэмжээний хэвтээ чиглэлтэй ачаалал үйлчилж болзошгүй эрсдэлт нөхцөлд "МАК Тауэр"-т хийж байгаа төмөр бетон гадсан шонгоос бүрдэх хамгаалалтын ханын бүтээц нь "КН Апартмент" хотхоны 6Д ба 6Е дугаартай орон сууцны барилгын буурь хөрсний тогтворыг сайжруулах эерэг нөлөөтэй..." болон "...тус орон сууцны барилгад ямар нэг сөрөг нөлөө ба эрсдэлт нөхцөл байдал үүсэх шинжлэх ухааны үндэслэл байхгүй болох нь судалгаагаар тогтоогдож байна" гэжээ.

Энэ талаар "Монголын Алт" ХХК /МАК/-ийн ерөнхийлөгч Н.Цэлмүүн цахим хуудастаа ШУТИС-ийн Геотехникийн судалгааны төвийн дүгнэлтийг цухас дурдаж, "Үндэслэлгүйгээр зогсоосон барилгын бэлтгэл ажлыг яаралтай буцаан эхлүүлнэ гэж найдаж байна" хэмээн байр сууриа илэрхийлжээ.