П.Сайнзориг: Мега төслүүдээ явуулахын тулд 6 хувийн цалингийн нэмэгдлээ хойшлуулахыг төрийн алба хаагчдад уриалж байна

Засгийн газраас шинэчлэн боловсруулж оруулж ирсэн 2025 оны төсвийн тухай хуулийн төслийг УИХ-ын чуулганаар хэлэлцэж байна.

Энэ үеэр УИХ-ын гишүүн П.Сайнзориг “Эдийн засгийн өсөлтийг бий болгох суурь бүтцээ бий болгох төсвөө хасчихлаа. Харамсалтай байна. Попорч, хуйлруулах урлаг гэж үнэхээр байдаг юм байна. 

Зарим нэг хүн гаргууд эзэмшсэн юм шиг байна. Үр дүнг нь хэдүүлээ гурван жилийн дараа эргээд ярина л даа. Төсөв бол зүгээр нэг компанийн төлөвлөгөө биш. Хүний эрхийг хангах, нийгэмд үүсээд байгаа суурь асуудлуудыг шийдэх, хувийн хэвшлийг дэмжих бодлогын баримт бичиг.

 Гэтэл компанийн төсөвтэй ялгаагүй шүү дээ, алдагдалгүй байх ёстой шүү дээ гэсэн юм яриад, ардын баатар царайлаад... 

Эцсийн дүндээ тэтгэвэр, тэтгэмж нэмэх орлогын эх үүсвэрийг бүрдүүлэх суурь дэд бүтэцгүй л байна. Одоо байгаа энэ дэд бүтэц дээр чинь авлига улам цэцэглэж байна, утаа униар нь манарч байна ш дээ.

Бид мега төслүүдээ хэрэгжүүлэхгүйгээр дараа цалин нэмэх төсвөө бүрдүүлж чадахгүй. Тиймээс цэвэрлэх байгууламж, Солонго 1, 2 хороолол, Эрдэнбүрэнгийн цахилгаан станцын бүтээн байгуулалтыг шуурхай явуулах гадаад зээлийн ашиглалтыг нэмэгдүүлэх бодлого байна. 

Солонгосчууд ээмэг бөгжөө хандивлах гээд дугаарлаж байсан гэдэг. Тиймээс би уучлал гуйж байгаад “Нэгдүгээр сарын 1-нээс нэмэгдэх 6 хувийн цалингийн нэмэгдлээ долдугаар сарын 1-нээс болгож хойшлуулъя” гэдэг уриалгыг төрийн алба хаагчдадаа гаргаж байна. Эндээс гарсан 200 тэрбум төгрөгийг гадаад зээл ашиглалт руугаа оруулья.

Газрын тос боловсруулах үйлдвэрийн ирэх жилийн санхүүжилт хасагдлаа. Энэ үйлдвэр хойшлоход бид жил бүр нэг тэрбум ам.доллар алдана. Сургууль, цэцэрлэгийн урсгал зардалд 100 тэрбум төгрөг зарцуулна. 38.5 тэрбум нь сургууль дээр байгаа. Цэцэрлэг дээр бол би юм ярихгүй. Харин 38.5 тэрбумыг нь хэмнээд сургууль, цэцэрлэгийн дутагдал үүсчихээд байгаа орон нутгийн сургуулиадад дотуур байрны хүрэлцээг сайжруулах асуудлыг нь шийдээд өгчихье.

Аялал жуулчлалын гол зам болсон Тэрэлжийн замын өргөтгөлийг нэг хүнтэй холбосоор байгаад хассан. Автобус дүүрэн жуулчид осолдсоны дараа л бид амаа барина. Засгийн газар дээр 44 хороо байгаа. Энэ хороодоос хуультайгаас бусдыг нь татан буулгая. Бүтээмжгүй бүтээмжийн хороо, Хурдасгуур энэ тэр гээд, юу хурдасгах гээд байгаа юм бэ.

Сүүлд нь хэлэхэд, бяслаг газарзүйн заалтаараа үнэд ордог. Тиймээс газар нутгийн онцлогийг нь судлаад өчихмөөр байна” гэв.

Гишүүний асуулт дээр Д.Амарбаясгалан дарга “Тэрэлжийн зам дээр заавал төр гэхгүй хувийн хэвшлийг оруулах боломж байхгүй юу” гэж нэмж асуусан. 

Дээрх асуултад П.Наранбаяр сайд “Боловсрол тэргүүлэх салбар учраас хувийн хэвшлийн хөрөнгө оруулалтыг татах бодлого явж байгаа. Гэхдээ төлбөр нэмэгдэх тусам төсвөөс өгөх хувьсах зардал буурах механизм ажиллуулж байна” гэсэн бол Б.Жавхлан сайд “Хороодыг татан буулгах асуудлыг тавья.

Салбарын сайд нар сууж байгаа учраас сонсож байгаа байх. Замын тухайд, Алтанбулагийн зам Тэрэлж шиг хангалттай урсгалтай. Бид хоёр удаа зарлаад ААН-үүд орж ирээгүй. Гэхдээ одоо бид хасагдсан бүх төслүүд дээрээ хувийн хэвшлийн хөрөнгө оруулалт татах гэж оролдоод үзнэ” гэж хариулав.