Ж.Чинбүрэн гишүүн ээ, “Би эрүүл мэндийн сайд болохгүй” гэж амлаач...

Одоо бүрэн эрхээ хэрэгжүүлж байгаа УИХ-д эмч мэргэжилтэй хэдхэн гишүүн бий. Тэдний нэг нь Ж.Чинбүрэн гишүүн. Хавдар судлалаар мэргэшиж, Хавдар судлалын үндэсний төвд мэс заслын эмчээс дарга хүртэл нь 20 жил ажиллаад улс төрд орж ирсэн хүн. Тэр ч утгаараа эрүүл мэндийн салбарын талаар хэлж байгаа үг, илэрхийлж байгаа байр суурийг нь олон нийт анхаарч сонсдог.

Гэтэл ариун цагаан эмч биш, харин ч бүр хачин сонин хандлагатай, эмийн бизнестэй нягт сүлбэлдсэн хүн байж мэдэхээр болоод явчихав.

УИХ-ын Нийгмийн бодлогын байнгын хорооны өчигдрийн хуралдаан дээр тэрбээр “БНСУ-аас хямд эм олж ирлээ” хэмээн Эрүүл мэндийн сайд Т.Мөнхсайхан руу дайрч, багтартлаа уурладаг юм байна.

Сайдын хэлснээр бол, манай улс эм, эмийн бүтээгдэхүүнийг үйлдвэрлэгчтэй нь шууд гэрээ хийж авах хууль эрхзүйн боломж бүрдүүлсэн. Хэрэглэгчдэд аль болох хямдаар хүргэх зорилгоор бий болгосон хуулийн боломжийг ашиглан, өвчтөнөөс гарах зардлыг 10 дахин буулгах ажил эхлээд явж байгаа юм  байна.

Эхнээсээ үр дүн гарч, чихрийн шижингийн нэг сар уух эм авахын тулд 60,000 төгрөг төлдөг байсан бол 6600 төгрөг, цус шингэлэх эмний нэг сарын хэрэгцээг авахын тулд 70-80,0 мянган төгрөг төлдөг байсан бол 7000-8000 төгрөг төлдөг болжээ.

Гэтэл Ж.Чинбүрэн гишүүн “Бид "Хэрэглэгчдийг хямд үнэтэй эмээр ханга" гээгүй, чанартай, боломжийн үнэтэй эмээр ханга гэсэн” гэж уурлаж байх юм. Үйлдвэрлэгчтэй шууд гэрээ хийхэд үнэ хямдарна. Олон үйлдвэрт санал өгөөд хамгийн хямдыг нь сонгохоор бүр ч хямдарна. Магадгүй энэ нь “Чанаргүй эм орж ирэх нь” гэж болгоомжлоход хүргэсэн байж болно. Гэвч эмийн чанар гэдэг тусдаа зүйл. Бид өөрсдөө стандартаа гаргаад “Ийм шаардлага хангасан эмийг энэ үнээр авья” гэж анхнаасаа танилцуулж байгаа гэдгийг Ж.Чинбүрэн сайн мэдэж байгаа. Энд бүртгэл хөнгөвчлөөд дистрибьютерүүд эм оруулж ирж сонголт үүсгэх боломж хэвээрээ байгаа гэдгийг ч мэдэж байна. Гэтэл яагаад тэгтлээ бухимдана вэ. Түүний амнаас гагцхүү хөнгөлөлт дээрээ 60-70, 70-80 мянган төгрөг нэмдэг байсан тэр ААН-үүдийн үг сонсогдоод байна уу гэж санагдсаныг нуух юун.

Ямартай ч хүмүүс одоо ч Гишүүн гэхээсээ илүү “Эмч” гэж дуудсан хэвээрээ байгаа энэ хүн хэрэглэгчдэд чанартай эм хямд үнээр зарахыг эсэргүүцлээ.

Кесерево хагалгаагаар төрж буй эхчүүд 400,000 төгрөгийн хөнгөлөлт авдгийг болиулах санал ч гаргасан дуулдлаа. “Өөрийгөө дараагийн Эрүүл мэндийн сайдаар төсөөлөөд удаж байгаа хүн” гэсэн хов ч сонсогдож байна.

Ж.Чинбүрэн гишүүнд хэлэхэд “Битгий л сайд болж үзээрэй”. Тань шиг хандлагатай хүн сайд болчихвол наад зах нь өвчтэй хүмүүс эмийн бизнесийнхний ашгийг халааснаасаа төлөх юм байна. Эхчүүд төрөхийн хүндрэлээс болоод эрсдэлд ч орж магадгүй нь. Өөр яах ч юм билээ.