Хуудуутай худалдаа буюу улсын төсвийн хөрөнгөөр 404 автобус "авсан" албан тушаалтнууд

Нийслэлийн нийтийн тээврийг тойрсон авлига, албан тушаалын гэмт хэргүүд хэрээс хэтэрч,  савнаасаа халив. Шинээр томилогдоод буй Хотын дарга Х.Нямбаатарын өнөөдрийн өгсөн мэдээллээр бол 2009 оноос хойш нийтийн тээвэрт  олон тэрбумын хохирол учруулсан аж ахуйн нэгжүүдийн нэрсийг зарлав. Тодруулбал, нийтийн тээвэрт нийлүүлсэн үе, үеийн автобуснууд "Шууд худалдан авалт" гэх нэрийн дор орж ирдэг байсан. Түүгээр зогсохгүй худалдан авсан автобус нь үйлчилгээнд нэг ч хоног явалгүй эвдэрсэн тохиолдол хүртэл гардаг байж: Энэ мэтчилэн импортоор оруулж ирсэн автобусны оныг сольдог, ашиглалтын шаардлага хангахгүй автобусыг худалдан авсан зэрэг хуудуутай үйлдлүүд их гардаг байжээ. 

Энэ талаар Хотын дарга Х.Нямбаатар “2009 оноос эхлэн нийтийн тээврийн салбарт автобус худалдан авахдаа нээлттэй тендер сонгон шалгаруулалт хийлгүй явж ирсэн байна. Тухайлбал, 2009 онд улсын төсвийн хөрөнгөөр  404 автобус худалдан авсан хэрнээ улсын болон нийслэлд огт бүртгэлгүйгээр  10 Аж ахуй нэгжид шууд шилжүүлсэн.

• Автобус I компанид-120,
• Автобус-III компанид-80,
• Цахилгаан тээвэр компани -50,
• Эрдэм Транс-30,
• Автобус нэгдэл-10,
• “Сутайн буянт”компани-30,
• “Цахилгаан тээвэр” компани 30,
• “Мяралзаа” компани 8,
• “Тэнүүн огоо” компани- 50,
• “Тэнүүн дэлгэр” компани-14,
• “Атибус” компани найм гээд нийт 400 автобусыг аваад тухайн ханшийн зөрүүнээс нийтдээ 35.6 тэрбум төгрөг улсын төсөвт мөнгө төвлөрүүлэхгүйгээр аж ахуй нэгжид өгсөн" хэмээв.

Үүнээс болж, дээр дурдсан аж ахуй нэгжүүд улсын төсвийн хөрөнгөөр худалдан авсан автобусны эргэн төлөлтийг хийгээгүй байна. Улмаар ханшийн зөрүүнээс шалтгаалж, 30 гаруй тэрбум төгрөгийн бодит хохирол үүссэн байна. Эл асуудлаар Өмчийн харилцааны газраас удаа дараа шүүхэд хандсан ч автобусыг анх улсын төсвийн хөрөнгөөр бүртгүүлсэн учраас Өмчийн харилцаа нэхэмжлэх эрхгүй гээд өнөөдөртэй золгосон байна. Автобус захиалагч нь Зам тээврийн яам,  санхүүжилт гаргасан яам нь Сангийн яам юм. Эндээс үзвэл өнгөрсөн 14 жилийн хугацаанд Хотын даргаар ажиллаж байсанн үе, үеийн нөхөд болон тухайн цаг хугацаанд Сангийн сайд, Зам тээврийн сайдаар ажиллаж байсан албан тушаалтнуудыг нэхэн шалгах шаардлага тулгарч буй юм. Тухайлбал, 2015 онд Экобус нэртэй 20 ширхэг автобусыг нэг бүрийн үнийг 269 сая төгрөгөөр нийтдээ 5.4 тэрбумыг шууд гэрээгээр худалдан авалт хийсэн байна. Харамсалтай нь гэрээний дагуу эдгээр автобус нийтийн тээвэрт явалгүй актлагдсан байна. Мөн Монбус-30 нэртэй цахилгаан автобусыг нэг бүрийг нь 470 сая төгрөгийн үнэтэйгээр худалдаж авсан. Гэвч авсан өдрөө л өгсүүр өндөрлөг газар явалгүй байсаар байгаад актлагдсан байна.  Дээрх автобуснуудыг шууд гэрээгээр худалдан авах үеийн Хотын дарга нарыг нэхэн санавал Г.Мөнхбаяр, Э.Бат-Үүл, Д.Сумъяабазар нар байгаа юм. 

Гэрэл зургийг mpa