​Улаанбаатар хотын замын шинэчлэлийн ажлуудыг бүхэлд нь зогсоох эсэх талаар санал асуулга явуулна

Нийслэлийн Засаг дарга бөгөөд Улаанбаатар хотын захирагч Х.Нямбаатар хотод өрнөж буй зам засвар, шинэчлэлтийн ажлыг бүхэлд нь зогсоож, хөндлөнгийн хяналт оруулах эсэх асуудлаар иргэдээс санал авах болсон талаар өнөөдөр мэдэгдлээ. 

Орон нутгийн сонгууль ойртсонтой холбоотойгоор улс төрийн өрсөлдөгчдийн зүгээс Нийслэлийн зам засвар, замын хашлага бродюр солих ажлыг харлуулж байгаатай холбоотойгоор ийм шийдэлд хүрсэн гэдгийг тэрбээр мэдэгдэлдээ учирлажээ. 

Тодруулбал, Ардчилсан намд нөлөөгөө тогтоосон Ерөнхийлөгч асан Х.Баттулга, ЕТГ-ын дарга асан З.Энхболд нар Нийслэлийн зам, засвар, шинэчлэлийн ажлыг зохион байгуулалттайгаар харлуулж, Орон нутгийн сонгуульд нөлөөлөх оролдлого хийж байгаа учир ажлыг бүрмөсөн зогсоож, хөндлөнгийн хяналт оруулсны дараа ирэх хавраас үргэлжлүүлэх санаачилгыг гаргаж байгаа аж. 

Санал асуулгын асуулт нь "Нийслэлд өрнөж байгаа зам засвар, шинэчлэлтийн ажлыг зогсоож, хяналт шалгалтын байгууллагаар шалгуулсны дараа ирэх хавраас үргэлжлүүлэхийг та дэмжих үү" гэсэн утгатай бөгөөд иргэд "Тийм", "Үгүй" гэсэн хоёр хариултаас сонгох боломжтой аж. 

Улаанбаатар хот энэ жил зам засвар, шинэчлэлтэй холбоотой 87 ажил төлөвлөснөөс 27 нь дуусаж, 60 нь эхэлсэн, эхлэхээр хүлээгдсэн байдалтай байгаа аж.

Нийслэлийн засаг дарга мэдэгдлийнхээ төгсгөлд иргэдэд хандан, санал асуулгад идэвхтэй оролцохыг уриаллаа.